Diyarname
Ev semboleke hêsan û xurt e. Tam 60 sal berê yekem car hat bikaranîn û hê jî li temamê dinyayê aştîxwaz bikar tînin. Em qala sembola aştiyê dikin. Li her derê dinyayê aştîxwaz û kesên dijî nukleerê vê sembolê bikar tînin.
Li Îngilistanê yên ku kampanyaya "Dawî li çekên nukleer bînin" amade dikirin, meşek mezin û bi bandor plan dikirin. ARmanc ew bû ku ji bo aştî û derdorê Meşa Paskalya li dar bişin. Bi hezaran kesên dijnukleer ji Kolana Trafalgar a Londonê ber bi Aldermaston ku fabrîkeya çekên nukleer lê bû bimeşiyana.
Xwediyê Xelata Nobelê yê Wêjeyê û fîlozof Bertrand Russel serokatiya kampanyayê dikir û biryar da ku sembolek ji bo meşê bê çêkirin. Russel peywir da Gerald Holtom ku sembolek çêbike. Holtomê grafîker Akadekiya Hunerê ya Kraliyetê ya Londonê xwendibû. Holtom di 21'ê reşemiya 1958'an de sembolê ku amade kiribû pêşkêş kir. Di sembolê hatibû çêkirin de giloverek hebû û li navê jî xêzek rast hatibû kişandin hebû. Du xêzên din li aliyên xêza li navê ve dirêj dibû. Ev xebat hat ecibandin û di meşa Paskalya de yekemîn car li ser pankartan hat bikaranîn. Wê çaxê li ser 500 pankartan ev sembol hat bikaranîn lê yên beşdarî meşê bûbûn hê nedizanîn ev çi sembol e. Lê her ku çû ev sembol li dinyayê navdar bû û niha her kes bikar tîne.
Grafîker Gerald Holtom kesek dij şer bû. Ew li çiftlikek nêzî Norfolk xebitî bû û li wir hînê alên behrvaniyê bûbû, hînê sembolên wan bûbû. Ji ber ku wî baş bi zimanê behrvanî dizanî dema ev sembol çêkir ji vê zanîna xwe sûde girt.
Piştî Londonê li DYA'yê aîlgirên Martin Luther King, li Afrîkaya Başûr reşikan dijî Apartheid ev sembol bikar anîn. Di sala 1983'yan de li Bonn û li eyaletên din ên Almanyayê bi sedhezaran kesî di protestoyên dij NATO'yê de ev bikar anîn.
Holtom ji bo vê sembolê telîf negirt û loma her ku çû her kesî li her derê bikaranîn. Û niha ev sembol tam bû 60 salî.