QEREÇÛX ENWER / HEWLÊR

Li navenda Polîtburoya YNK’ê ya bajarê Hewlêrê civîna PDK, Tevgera Goran û YNK’ê îro di saet 12:30'an de dest pê kir û piştî 4 saet û nîvan civîn bi dawî bû.

Piştî civînê Serokê Şandeya YNK'ê û Berpirsê Desteya Rêveberiya Polîtburoya YNK'ê Mele Bextiyar civîna çapemeniyê lidarxist û got; "Ji du salên derbasbûyî ve civînek gelek girîng bû. Piştî erêkirina 7 xalan ji aliyê Meclisa Rêveberiya YNK'ê ve ku ligel PDK, Tevgera Goran, Komele û Yekgirtû hatibûn guftûgokirin, îro me bi şêwazekî gelek baş guftûgo li ser van xalan kir. Me xal bi xal guftûgo kir, nêrînên me hevbeş bûn û guftûgo erênî bûn.

Mele Bextiyar axaftina xwe wiha domand; "Biraderên Tevgera Goran wê guftûgoyên civînê binirxînin, emê sibê pêwendiyê ligel deynin. Her wiha wê sibê yan du sibê civînek din a sê alî pêk were. Wê civîna bê li Navenda Tevgera Goran pêk were. Ez hêvîdarim ku di civînê de em li ser xalan li hev bikin. Eger Tevgera Goran wekî îro be, gelek baş bû, hêvîdarin ku bigihîn lihevkirinê. Tevgera Goran amade ye ji bo karkirina hevbeş û parlamentoyê aktîf bikin. Hêvî heye ku ev du roj di dîroka Kurdistanê de bibin rojên dîrokî."

Şanda PDK’ê ya ku tevlî civînê bûyî ji, Sekreterê Polîtburoya PDK’ê Fazil Mîran, endamên polîtburoya PDK’ê Azad Berwarî, Roj Nûrî Şawês û endamê rêveberiya PDK’ê Dilşad Şehab pêk di hat.

Şanda YNK’ê ji Berpirsê Desteya Rêveber a Polîtburoya YNK’ê Mele Bextiyar, Berdevkê YNK’ê Sedî Ehmed Pîre, endamê Polîtburoya YNK’ê Şoreş Îsmaîl, Bêger Talebanî, Ednan Heme Mîna û endamê rêveberiya YNK’ê Rizgar Elî pêk di hat.

Her wiha şandeya Tevgera Goran a tevlî civînê bû ji endamên Desteya Rêveber a Goran Celal Cewher, Reûf Osman, Şoreş Hacî, Aras Welî, Rêveberê Odeya Yasa yê Goran Îsmaîl Namîq û Rêveberê Odeya Peywendiyên Dîplomasî yê Goran Şêx Hîmdad Hîranî pêk dihat.

Ji Rojnewsê hatiye girtin