SERBAZ SIYAMED

Heyeta DTP'ê ku bi armanca hevdîtinên têkildarî çareseriya pirsgirêka kurd û pêşvebirina têkilya di navbera hêzên kurd de hate Herêma Kurdistana Federal, bi Serokomarê Iraqa Federal Celal Talabanî re hevdîtin pêk anî. Hevserokê DTP'ê Turk li Balefirgeha Silêmaniyê diyar kir ku heta pirsgirêka kurd neyê çareser kirin dê li Rojhilata Navîn aştî û demokratî pêş nekeve.

Heyeta DTP'ê ya ji Hevserokê DTP'ê Ahmet Turk, Emîne Ayna, Berdevkê Demê yê Kongreya Civaka Demokratîk (CDK) Hatîp Dîcle, Şaredarê Bajarê Mezin ê Amedê Osman Baydemîr, parlementerên DTP'ê Sebahat Tuncel û Sevahîr Bayindir pêk tê, bi rêya hewayî gehîştin Kurdistana Federal. Heyeta DTP'ê li Balefirxaneya Silêmaniyê ji aliyê endamên Polît Buroya YNK’ê Mela Bextiyar û rayedarên YNK'ê ve hate pêşwazîkirin. Hevserokê DTP'ê Ahmet Turk, li balefirxaneyê pirsên rojnamegeran bersivandin.

'Pirsgirêka kurd ne tenê pirsgirêka Tirkiyeyê ye'

Turk balkişand ser nîqaşên li ser çareseriya pirsgirêka kurd li Tirkiyeyê tên meşandin û bi bîr xist ku Serokwezîr R. Tayyîp Erdogan û Serokomar Abdullah Gul têkildarî mijarê daxuyanî dane. Turk destnîşan kir ku pirsgirêka kurd ne tenê pirsgirêka Tirkiyeyê û ev tişt gotin: "Pirsgriêka kurd pirsgirêka hemû Rojhilata Navîne. Heya pirsgirêka kurd neyê çareserkirin, dê li Rojhilata Navîn aştî û dîmokrasî pêk neyê. Ji ber ku kurd, ereb, fars û tirk bi hev re dijîn."

'DTP bi Talabanî re hate cem hev'

Li ser hatina DTP'ê ya Kurdistana Federal jî jî Turk anî ziman ku bi armanca nîqaş kirina çareseriya pirsgirêka kurd û danûstandina derbarê pirsgirêkên Rojhilata Navîn û geşedanên dawî de hatine Kurdistana Federal. Piştî daxuyaniyê heyeta DTP'ê derbasî Serokomarê Iraqê Celal Talabanî bû. Endamên çapemeniyê negirtin hevdîtinê. Hevdîtina DTP'ê bi Talabanî re berdewam dike. Çav li rê ye piştî hevdîtina bi Talabanî re heyeta DTP'ê derbasî Hewlêrê bibe û bi Serokê Herêma Kurdistanê Mesut Barzanî re bê cem hev. Heta DTP'ê dê di 20'ê îlonê de vegere.

Ji DÎHA'yê hatiye girtin