Diyarname

Barselona nekarî vegere, Bayer serî tewand û di dawiyê de 4 nîv fînalîst diyar bûn.

Juventus bi ser ket

Her du maçên din ên ji bo derbasbûna nîv fînala Lîga Şampiyonan îşev hatin lîstin. Li Camp Nou Barselona û Juventus hatin hemberî hev. Di maça yekemîn de Juventus li mala xwe bi 3-0 bi ser ketibû û bi vê serketinê lîst. Juventusê rê neda Barselonayê û maç bi 0-0 bi dawî bû. Bi vê encamê Juventus derbasî nîv fînalê bû.

Barselona di maçên dora 16 tîman de li hemberî PSG'ê 4-0 têk çûbû lê li mala xwe 6-1 bi ser ketibû, dîrok nivîsî bû û derbasî çarîk fînalê bûbû lê vê carê nekarî ji nû ve vejîn bibe.

Monaco bû nîv fînalîst

Di maça din a vê êvarê de Monaco li mala xwe Borussia Dortmund kir mêvan. Di maça yekemîn de li Almanyayê pêşî teqîn çêbûbû, rojek din maç hatibû lîstin û di dawiyê de Monaco bi 3-2 bi ser ketibû. Di rovanşa vê maçê de Monaco li mala xwe Dortmund bi 3-1 têk bir û derbasî nîv fînalê bû.

Real û Atletico Madrid jî nîv fînalîstin

Duh Real Madridê tîma mezin a alman Bayer Munih bi bi 4-2 têk biribû û derbasî nîv fînalê bûbû. Tîma Spanyayê Atletico Madrîd jî bi tîma îngilîz Leicester City re 1-1 ma, ji ber di maça yekemîn de 1-0 bi ser ketibû derbasî çarîk fînalê bû.

Ji bo her çar tîmên serketî Real Madrid (Spanya), Atletico Madrid (Spanya), Juventus (Îtalya) û Monaco (Fransa) roja 21'ê mehê saet 13.30 de li Nyonê pişke bê kişandin. Saetek paşê jî ji bo Lîga Ewropa ya UEFA'yê dê pişke bê kişandin.

Maçên nîv fînalê yên Lîga Şampiyonan yên yekemîn rojên 2-3'yê gulanê, maçên duyemîn 9-10'ê gulanê dê bêne lîstin û fînalîst diyar bibin. Maça fînalê dê 3'yê pûşpera 2017'an li bajarê Cardiff a Gallerê bê lîstin.