Diyarname
Wêjeya kurdî dibe mêvanê 53'yemîn Bîenala Venedîkê. Nivîskarên kurd Helîm Yûsiv, Dilawer Zeraq û Arjen Arî dê li ser wêjeya kurd biaxivin.

53'yemîn Bîenala Navneteweyî ya Venice (Venedîkê) di 07.06.2009'an de dest pê kir û çalakiyên Bîenalê heta 07.11.2009'an didomin. Di nav Bîenalê de kurd di bin beşa "PLANET KURDISTAN" de hunera xwe pêşkêş dikin. Heta niha kurdan pêşangeh vekirin, çalakiyên xwe yên çandî didomandin. Her wiha çalakiyên kurdan bi eleqeyeke baş re jî rû bi rû dimînin.
Di mehên pêşiya me de çalakiyên kurdan ên cur bi cur di nav vê beşê de dê bidominin. Yek ji wan jî gotûbêja li ser wêjeya kurd e.
Di gotûbêjê de ji duh heta îro wê wêjeya kurd bê nîqaşkirin, meseleya "Di wêjeyê de ziman, çand û sînor" bibe mijara giftûgoyê. Nivîskarên malpera me Helîm Yûsiv, Arjen Arî û nivîskar Dilawer Zeraq wê di gotûbêjê de li ser mijarê dîtinên xwe bînin ziman.
Çalakiya ku dê 26'ê rezberê roja şemiyê li dar bikeve de dê kesên wekî Hermann Bellinghausen (Ji Mexico Chiapas, ji rojnameya La Jornada, niviskar û derhêner), Fito Rodriguez (Serokê Komeleya Nivîskarên Baskê), Danny Morrison (ji Bakurê Îrlandayê), Gianfranco Bettin (Îtalya), Enrico Palandri (Îtalya), Renzo di Renzo (Îtalya) de jî ji aliyê xwe ve li ser mijarê axaftinê bikin.

Her wiha di çalakiyê de, di navbera 17-20'ê meha rezberê de jî dê fîlmên kurdan ên bi navê "Çûyîn", "David and Layla", "Close up Kurdistan", "Stars of my homeland" ve bêne nîşandayîn.

***

Nûçeyên eleqedar:

- Li Bienala Venice tabloyên kurdan

- Hunermendên kurd beşdarî Bîenala Îtalyayê dibin

***

Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.