Diyarname
Helbestvan Kawa Nemir vê carê bi "Salname"yê derket pêşberî xwendevanênxwe.

Yek ji helbestvanê hilberîner ê kurd Kawa Nemir e. Wî heta niha gelek helbest nivîsandine, li dor 5 hezar heb helbest ji zimanên biyanî wergerandine kurdî. Nemir ku berê bi navê "Selfakpiroş", "Bîşenga Deşta Dûr" pirtûkên wî yên helbestan hatibûn weşandin niha bi navê "Salname" pirtûkek din weşand. "Salname"ya Nemir ji Weşanên Lîsê dekket.

Helbestvan Kawa Nemir yek ji edîtorên kovara Rewşenê û yek ji nifşê Rewşenê ye. Wî heta niha digel helbestên ku nivîsandine, gelek helbest ji zimanên îngilîzî û tirkî wergerandine kurdî û pirtûk weşandine.
Nemir ku demekê weşanxaneyeke bi navê "Bajar" vekir, lê nebir serî û navber da karê weşangeriyê. Helbestvan Nemir niha ji bo Weşanên Lîsê edîtoriya Rêzeya Klasîkan û Wêjeya Cîhanê dike.

Wekî her du pirtûkên din Kawa Nemir, helbesteke dirêj a bi navê Salname ji vê pirtûka sêyemîn re bûye nav.
Salname helbestek e, ku ji duwanzdeh paran pêk tê û bi şêweyê xwe yê pexşanî ve qonaxa nifşê helbestvanên Bakur li ber roniya kêliyên evîneke mirî dixwîne. Nemir ji sala 1997'an ve dest bi vê helbesta dirêj kiriye, ew di kovarê de daye weşandin lê pêre, bi sal û zemanan re careke din û careke din lê vegeriyaye, ew guhartiye, di encamê de bi navê "Salname" gihandiye helbesthezan.

Kawa Nemir li gel helbestine wiha dirêj, ew helbestkarekî kurd e, ku helbestên kurt dinivîse, pê hewl dide kêliyên ku bi lemelema rûbarekî dikişin, bûyer û qewamên ku li kar in deriyên xwe bi ser deşt û bajarên bêna de vekin, zeft bikin.
Helbesta wî bi vî awayî ji du milan ve dikişe û tevî besterûbara firawan a helbesta Kurdî dibe. Salname jî, wekî pareke vê kuliyata ku pariyekî hatiye nivîsandin û hê jî tê nivîsandin, bi vî rengî digihîje xwendevan û hezkirên helbesta Kurdî.

Salname / Kawa Nemir / Weşanên Lîs / 96 rûpel