Diyarname

Selahattin Bulut di nav cîhana nivîsa kurdî de bi du nasnameyên xwe tê nasîn. Yek ji wan pirtûkfiroşiya wî ye û hema bibêje her derê dinyayê re, ji kurdan re pirtûkan dişîne, difroşe wan; nasnameya wî ya din jî nivîskariya wî ye ku ew bi çîrokên xwe tê nasîn. Em vê mehê wî dikin  mêvanê Portreya Mehê.

Nivîskar û pirtûkfiroş Selahattin Bulut di sala 1954’an de li Dêrikê hatiye dinyayê. Wî, Enstîtuya Perwerdeyiyê li Mêrdînê xwendiye û temam kiriye. Piştî temamkirina dibistanê Bulut li Dêrikê û li Qersê du salan mamostetî kiriye. Di heman demê de jî di nav xebatên siyasî de, di nav têkoşîna derdorên kurdan ên berî Derbeya 12’yê Rezberê ya 1980’yan de cih girtiye. 

Bulut ji ber van xebatên xwe yên siyasî di sala 1981’ê de hatiye girtin û û 8 salan di Girtîgeha Leşkerî ya Amedê de maye.

Di wê serdema derbeyê de çawa girtiyên kurd li wê girtîgehê bi îşkenceyên gelek giran re rû bi rû mane, Bulut jî ji van îşkenceyên giran para xwe girtiye. 

Nivîskar Selahattin Bulut piştî derketina ji girtîgehê dibe ku zêde xwe nedaye nav siyasetê lê xebata xwe ya li ser nivîsê dom kiriye. Wî pêşî li ser jiyana rojnamegerê kurd Hafiz Akdemîr ku Akdemîr ji aliyê hêzên tarî ve hat kuştin pirtûkek amade kir. Dûre jî li ser Edîb Karahan pirtûkek amade kir û weşand. 

Selahattin Bulut di sala 1997’an de li Stenbolê “Pirtûkxaneya Medyayê” vekir û dest bi firotina pirtûkên kurdî kir. Ji wê rojê û heta niha ku vî karê xwe didomîne navê wî û navê pirtûkfiroşiya wî li çar aliyê dinyayê belav bûye. Bulut ku dibêje, “Bi pirtûkan bêhna min fireh dibe. Dema kesek tê pirtûkxaneyê, pirtûkan nekire jî hema lê binêre jî pê kêfa min tê”, bi hemû hezkirin û hêza xwe vê “kêfa xwe” didomîne. 

Selahattin Bulut di nav ew qas pirtûkan de dest bi nivîsandina çîrokan kir. Pirtûka wî ya yekemîn a çîrokan “Bihuşta Lal” di sala 2006’an de weşand. Heta wê demê du pirtûkên Bulut derketibûn, lê mirov dikare bibêje herî zêde bi vê pirtûka xwe hat nas kirin û di nav nivîskarên kurd de cihê xwe girt. Di Bihuşta Lal de gelek çîrokên balkêş cih girtin.

Bulut paşê bi navê “Xadim” pirtûkek din derxist. Xadim ku çîrokek dirêj e di sala 2008’an de hat weşandin. “Xadim” li ser çîroka kesekî ku di Girtîgeha Amedê de bi îşkenceyan re rû bi rû maye û piştî ku derketiye rewşa wî ya trajîk radixe ber çavan.

Nivîskar û pirtûkfiroş Selahattin Bulut ji bilî ev pirtûkan, hin nivîsên wî di kovar, rojname û malperên kurdan de hatine weşandin.