Diyarname
Endamê Desteya Rêveber a Tevgera Civaka Demokratîk Aldar Xelîl got: "Mesûd Barzanî di civînên bi serokên welatên Ewropayê de dibêje, "PYD bela ye, pêre hûn bidin û bistînin dê sere we jî bikeve belayê."
Aldar Xelîl ligel Hevseroka PYD’ê Asya Abdullah çû paytexta Îngilistanê Londonê semînerek da. Semîner li Peymangeha Melîkî ya Têkiliyên Navneteweyî ya Londonê (Chatham House) bû. Semîner bi sernavê “Hikûmeta herêmî ya Rojava û bersiva navneteweyî” hate organîzekirin. Li bendê ku heyeta Rojava ligel rayedarên hikumeta îngilîz hevdîtinan çêbikin. Aldal Xelîl beşdarî kanala Stêrk TV bû û xalên balkêş anî ziman.
'Barzanî çi dixwaze bila bixwaze lê çima li ser me wisa diaxive?'
Xelîl li ser helwesta Serokê Herêma Kurdistana Federe Mesûd Barzanî jî sekinî û got: "Ji heyetên serokên dewletan ji me re gotin Barzanî gotiye, 'PYD bela ye, pêre hûn bidin û bistînin dê sere we jî bikeve belayê.' Her wiha Barzanî di van hevdîtinan de ji wan re gotiye 'bila leşkerên Tirkiyeyê jî beşdarî operasyoneke li Misûlê çêbibe bibin.' Ev mijarek wisa cihê mixabiniyê ye. Em gere li dijî hev tevnegerin, nekevin nav hewldanên wisa. Tu çûyî bi serokê welatek re axivî, çi dixwazî jê bixwaze, lê tu çima li ser me tiştek wisa dibêjî?"
Xelîl got ku ew dixwazin biratiyê pêş bixin, birayên wan ên ereb jî hene di nav xweseriyê de û ew dixwazin hîna bêhtir biratî pêş bikeve, di nav Federasoyna Bakurê Sûriyê de ev heye.
'Naveroka Federasyonê girîng e'
Aldar Xelîl got ku di demek nêzîk de wê Federasyonê ragihînin û got: "Emê serjimariya milet xilas bikin. Piştî serjimarî çêbû dê hilbijartin jî çêbe. Êdî Rojava hatiye naskirin. Bi vê sîstema nû Rojava mezintir dê bibe... Li ser nav milet biryarê bide dikare nav biguhere. Bakurê Sûriye dibe tiştek din be... Carinan tu navek xweş lê dikî lê naverok vala ye. Em naverokê dadigirin. Em dibêjin bila kurd bi mafên xwe bêne qebûlkirin. Ji bo vê divê yên li dijî te jî li cem te bin. Em navek giştî bikar bînin ku ew jî bêm cem te. Nexwe tu tenê navê xwe lê bikî û bibêjî werin cem min, ma dê ji te re nebêjin te navê xwe jixwe lê kiriye, ka ez çawa bêm. Loma, naverok girîng e. Sibe milet bixwaze dikare navek din lê bike."
Li Girê Spî meseleya alên DYA'yê
Aldan Xelîl li ser daliqandina alên DYA'yê (Dewletên Yekbûyî yên Amerîkayê) yên li Girê Spî jî wisa got: "Du roj berê agahî hatin Artêşa Tirk dixwaze bikeve Girê Sipî. Agahî hatin. Hêzên Amerîkî jî hebûn li wir, wan hema bi serê xwe ala xwe daliqandin bêyî em tiştek wisa bixwazin. Wan leşkeran dibe ji bo xwe ala xwe daliqandibin lê ez ne bawerim leşkeran hema bi serê xwe kiribin. Ev yek şiroveyek wê heye, maneyek wê heye, ew dibêjin ev der xeta sor e. Berpirsiyarî girtin. Ev helwestek e. Li Raî jî heman tişt çêbû."
Girêdana Kobanî û Efrînê
Endamê Desteya Rêveber a Tevgera Civaka Demokratîk Aldar Xelîl li ser pevgirêdana Kantonên Kobanî û Efrînê jî wisa got: "Alî însanî de jî siyasî de jî gere em Efrînê ji vê çemberê derxin. Ev sê sal in Efrîn ber xwe dide. Ez silavên xwe ji bo wan dişînin. Gere em Efrînê ji vê çemberê derxin. Gere Bakurê Sûriyê bibe yek. Xebat berdewam e, îro, sibê, mehek din be nizanim lê divê bigihîje hev. Dê du herdu Kanton bigihên hev."