Diyarname

Fûara Pirtûkan a Stenbolê îsal Almanyayê dike Welatê Mêvan û hat ragihandin ku di vê çarçoveyê de Almanya dê piştgiriya xwe ya ji bo nivîskarên li Tirkiyeyê yên girtî eşkere bike.

Îsal Fûara Pirtûkan a Stenbolê 35'emîn car deriyên xwe dê roja 12'yê sermawezê veke û heta 20'ê mehê bidome. Mêvana Rûmetê ya îsal akademîsyen Prof.Dr. Ioanna Kuzuradi ye. Wekî welat jî Mêvanê Rûmetê Almanya ye. Festîval îsal li ser bingeha "Felsefe û mirov" tê li dar xistin û di vê çarçoveyê de dê gelek mêvan bên festîvalê.

Almanya piştî ku wekî mêvanê rûmetê hat ragihandin Almanyayê jî di vî warî de dest bi xebatan kir. Di vê çarçoveyê de 29 weşanxaneyên alman dê beşdarî fûarê bibin û nivîskarên alman ên wekî Ilija Trojanow, Olga Grjasnowa, Silke Scheuermann, Peter Schneider, Judith Kuckart û Emine Sevgi Ozdamar jî bên fûarê. Her wiha Almanya di fûarê de j i bo piştgiriya nivîskarên li Tirkiyeyê yên di zindanê de ye û yên li derve dê azadiya çapemenî û ramanê bide nîqaşkirin.

Berpirsê Projeyên Fûara Pirtûkan a Frankfurtê ya Navneteweyî Barbel Becker wisa gotiye: "Em dixwazin piştgiriya xwe ji bo hempîşeyên xwe yên karê xwe di bin zor û zehmetiyê de dikin nîşan bidin."

Becker diyar kiriye ku nivîskara Ozgur Gundemê Asli Erdogan ku niha girtiye di sala 2008'an de di nav heyeta tirk a beşdarî Fûara Frankfurtê de bû ye. Her wiha Becker gotiye ku girtina weşanxaneyan jî wan dixe nava fikaran.

Almanya di çarçoveya fûarên de rojên 12-15'ê sermawezê bi sernavê "peyv diguherînin" di fûarê de cih bigire, amadehiyê beşdariyê ji aliyê Fûara Pirtûkan a Frankfûrtê, Enstîtuya Goethe, Wezareta Karên Derve û Wezareta Maliyeyê ya Federal têne kirin.