Diyarname

"Çîroka Reşpoşan" pirtûkek çîrokan a Dana Fayeq e. Pirtûk yekem car di sala 2008'an de li Silêmanî bi soranî hatiye weşandin û niha jî ji aliyê Weşanên Peywendê ve bi kurmancî hat çapkirin. Îhsan Yalin ji soranî pirtûk kiriye kurmancî û Peywendê jî ew weşandiye.

Fayeq di sala 1975'an de li bajarê Silêmanî hatiye dinê û ji sala 1998'an ve di warê edebî de dinivîse. Çîrokên wî di gelek festîvalên edebî de xelat girtine. Çîroka Reşpoşan ku bi soraniya wê "Hikayetî Reşpoşekan" hatibû çapkirin niha bi kurmancî li ber destên xwendevan e.

Çîroka Reşpoşan ji aliyê hejmara rûpelan ve pirtûkek zirav e, lê ji hêla teşe, mijar û hemû taybetiyên xwe yên din ên edebî ve berhemeke xurt û qedirbilind e. Di pirtûkê de 9 çîrokên cuda cih digirin.

Dana Fayeq ku mijarên çîrokên xwe yên di vê berhemê de bi giştî ji jiyana kurdan a berê û serpêhatiyên zarokatiyê wergirtiye, heta bibêjî bi rengekî estetîk, bi vegotineke xurt û ramaneke felsefîk, bi îmkanên hunerî yên edebiyatê ew gihandine asta dirûvê gerdûnî. Rexneya civakî, bi gotinek din rexneya li civaka kurd a kevneşopî mijara herî sereke ye di çîrokên wî de. Her wisa bîranîrêr zarkatiyê û hesreta rojên borî xalek din e ku balê dikişîne. Xwendevan dê ji vê berhemê hemû tam û çêja berhemeke edebî ya xurt werbigire û jê hez bike.

- Çîroka Reşpoşan / Dana Fayeq / Ji soranî bo kurmancî Îhsan Yalin / Çîrok / 2015