Diyarname
28’emîn Festîvala Fîlman a Navneteweyî ya Stenbolê bi dawî bû. Îsal 162 hezar kesî li fîlman temaşe kir.
Festîvala Fîlman a Navneteweyî ya Stenbolê ku ji aliyê ÎKSV ve haüe li dar xistin li 7 sînemayan, di 455 seansan de bi giştî 200 fîlm hatin nîşandayîn. Tevî yên bilêt girtine û yên vexwendî bi giştî 162 hezar kesî li fîlman temaşe kir. Di festîvalê de digel nîşandayîna fîlman 9 dersên sînemayê û gotûbêj, 2 şahî û çalakiyên taybet ên festîvalê li dar ketin.
Nava hefteyê fîlm bi 3,50 Ykr’yî dihatin firotin û ev seansên festîvalê bi eleqeyeke mezin re rû bi rû ma. Her wiha beşên wekî “Asiler, Azizler, Âşiklar”, fîlmê beşa “Sînemaya Arjantînê” “Galayên Akbankê”, “Belgefîlmên NTV”, “Fîlmên ji Festîvalên Dinyayê”, “Hostayên Ciwan”, “Herêma Bi Mayînan”, “Şeydabûna Şevê” rastî eleqeyeke baş hatin.
Di festîvalê de ji derhênerên navdar Peter Greenaway, Jerzy Skolimowski, François Ozon, Heddy Honigmann, Bill Plympton, ji lîstikvanên wekî Nandita Das (lîstikvana navdar a sînemaya Hîndê), Jean-Stéphane Sauvaire, Sıddık Barmak, Jean Mach, John Malkovich (Malkovich Xelata Rûmetê ya Sînemayê girt) jî bûn mêvanên festîvalê.
Di festîvalê de derhêner, lîstikvan û sazkarên fîlman piştî nîşandayîna fîlman derketin pêşberî temaşevanan û bi wan re li ser fîlm sohbet kirin.
Her wiha di festîvalê de fîlmên kurdan û yên li ser kurdan ên wekî Şewax (Kazim Oz), “Du ziman, yek bahol” (Orhan Eskikoy û Ozgur Dogan), “Kirasê Mirinê: Hêwîtî” (Mujde Arslan), “Piresûr” (Caner Canerik), “Girtîgeha bi 5 Nimro” (Çayan Demirel), “Welcome” (Philippe Lioret) jî hatin nîşandayîn.
29’emîn Festîvala Fîlman a Navneteweyî ya Stenbolê dê avrêla 2010’an de li dar bikeve.
Nûçeyên din ên li ser 28'emîn Festîvala Fîlman a Navneteweyî ya Stenbolê:
- Ji bo saleke din xatir xwest
- Hilbijartineke bi vî awayî bi ser ket
- John Malkovich xelata xwe girt
- Dersên ku ji "50 mirovên mirî" bêne girtin
- Festîvala Fîlman a Stenbolê dest pê kir