STENBOL

Li Stenbolê bi qedexeya Walîtiyê û astengiyên polîsan re, ji çar aliyên bajar bi deh hezaran welatî herikîn Qada Bazara Gel a Bakirkoyê ya Stenbolê. Girseyên ku rastî astengiyên polîsan hatin li diji polîsan ber xwe dan û Newroz pîroz kirin. Ji ber qedexe û astengiyan li her derên Stenbolê Newroz hat pîrozkirin û her der bû qadên serhildana gel. Di pîrozbahiyan de polîsan êrîşî welatiyan kirin û zêdeyî 30 kes binçav kirin. 

Bi hezaran Stenbolî ji bo beşdarî pîrozbahiya Newrozê ya li Qada Bazara Gel a Bakirkoyê bibin ji serê sibê de berê xwe dan Qada Newrozê. Girseyên ku ji çar aliyên Stenbolê berê xwe dan Bakirkoyê li gelek nokteyan rastî astengî û êrîşên polîsan hatin. Girseyên ku ji serê sibê de li ber avahiya navçeyên Bagcilarê a HDP'ê kom bûn, bi otobusan xwestin biçin qada Newrozê. Girseya ku xwest bimeşin rastî êrîşa polîsan hatin. Di êrîşa polîsan de gelek kes bi lêdanê hatin binçavkirin. Polîsên bi maşîneyên zirxî li nava taxan geriyan gef li welatiyan xwarin. 

Gel li dijî êrîş û qedexeyan daketin qadan û Newroz pîroz kirin

Li Pira Metro ya Încirlî ya Bakirkoyê jî bi hezaran welatî kom bûn û xwestin bimeşin qada Newrozê. Polîsan bi bombeyên gazê û guleyên plastik êrîşî girsê kir û pevçûn derket. Di bûyerê de gel li kolan û taxan belav bûn. Gel li dijî polîsna bi inat Newroz pîroz kirin. 

Ciwanan bi berxwedanê bersiv da polîsan

Li Bakirkoyê xebatkaren Kovara Ozgur Halkê Sipan Kaya û Rabîa Ozkaya jî bêyî hincet bê nîşandan hatin binçavkirin. Ciwanên ku bi silogana "Bijî Serok Apo"xwestin bimeşin qada Newrozê rastî êrîşa polîsan hatin. Ciwanên rasti êrîşê hatin jî bi berxwedanê bersîv da polîsan. 

Li her derê govend hat gerandin

Girseyên ku li Parka Çirpici ya Zeytînbûrnu ya Stenbolê jî kom bûn li dijî qedexeyên AKPê dîsa Newroz pîroz kir. Girsê bê navber siloganên "Her der Newroz, her der berxwedan" û "Bijî berxwadana Sûrê" berz kir. Polîsên ku pîrozbahî tehamul nekir bi bombeyên gazê û ava şid êrîş kir û girsê jî bi govendê bersîv da polisan. 

Li Haciahmetê jî polîs bi maşîneyên zirxî li kolanan geriyan û li GBT'ê welatiyan nerîn. 

OHD: Li gorî agahiyên gihiştin me 30 kes hatin binçavkirin

Gel li dijî êrîşên polîsan û qedexeyên AKP'ê dîsa gel li gelek qadan Newroz pîroz kir û di ber xwe da. Komeleya Hiqûqnasên Azadîxwaz (OHD) diyar kir ku li gorî agahiyên gihiştine destê wan herî kêm 30 kes hatine binçavkirin. Binçavkirin didome. Ji rêveberên HDP'ê Huseyin Vural (reveberê Rêxistina Stenbolê) hat binçavkirin.

Hevseroka HDP'ê Figen Yuksekdag, Mebûsên HDP'ê yên Stenbolê Pervin Buldan, Filiz Kerestecioglu, Hevserokê HDP'ê yê Stenbolê Cesim Soylu, mebûsê HDP'ê yê berê Levent Tuzel û komek endamên HDP'ê li Şîrînevlerê li avahiya HDP'ya Bahçelievlerê hatin ba hev. Hevserokê HDP'ê yê Stenbolê Cesim Soylu û Wekîla HDP'ê Filiz Kerestecioglu, li ber avahiya HDP'ê ya Bahçelievlerê daxuyanî da. Hevserokê HDP'a Stenbolê Soylu, helwesta polîsan û biryara walîtiyê şermezar kir û diyar kir ku ev helwest tu carî nayê qebûlkirin. 

Her wisa Soylu got: "Walîtî li Avcilar, Kadikoy û gelek cihên din dest danîn ser erebeyên me ku gel pê dihat Newrozê. Li Bakirkoy jî gelek kes hatin binçavkirin."

Wekîla HDP'ê Filiz Kerestecioglu jî êrîşên polîsan şermezar kir û xwest hemû kesên hatine binçavkirin serbest bên berdan.