Fatma Koçak - Erdogan Altan - Wan

Li Wanê encama anketa di navbera 13-16`ê reşemiyê de hatiye çêkirin derkete holê ku DTP bi ferqeke mezin li pêşiya hemû partiyan e.
Di anketê de DTP`ê ji sedî 44 û AKP`ê ji sedî 32 deng girtin. Balkêş e ku ji hilbijêrên di 22`yê tîrmehê de dengên xwe dane AKP’ê ji sedî 30`ê wan piştî polîtîkayên AKP`ê yên demên dawî biryar guhertine û piştgiriyê didin DTP`ê. Di anketê de encameke balkêştir jî alîkariya AKP`ê ya li xizanan belav dike ye. Her wiha ji sedî 97`ê kesên beşdarî anketê bûyîn, diyar dikin ku alîkariyên AKP belav dike li ser dengên wan bandorê nake. Koordînatorê Lêkolînê Sosyolog Murat Akdag, diyar kir ku helwesta Erdogan a li Davosê berovajî bajarên din ên Tirkiyeyê li herêmê bandor nekiriye.
Bi nêzîkbûna hilbijartinan anketên der barê mijarê de jî zêde dibin. Li gorî encamên du anketên di mehên çile û sibatê de ji aliyê Şîrketa Orîent Farma li Wanê çêkirîn de DTP bi ferqeke mezin li pêş e. Anketa yekemîn di navbera 11 û 15`ê çileyê de hate çêkirin. Di çarçoveya anketê de li 602 malan bi welatiyan re hevdîtinên rû bi rû hatin kirin. Di encama anketê de derket holê ku ji sedî 33`ê dengê xwe didin DTP`ê, ji sedî 32 jî didin AKP`ê. Ji sedî 29`ê wan jî bêbiryar bûn.
Ji sedî 4 jî partiyên din tercîh dikirin. Di anketa duyemîn a di 13-16`ê sibatê de hate çêkirin îbreya dengan ji bo DTP`ê nîşan da. Di çarçoveya anketê de li 26 taxan li 306 malan hevdîtinên rû bi rû hatin çêkirin. Di anketa ku mehek navberê de derbas bûye de, ji sedî 44`ên hilbijêran diyar kir ku dê dengê xwe bidin DTP`ê. Her wiha dengên AKP cardin neguherîn û ji sedî 32 man. Di anketa mehek berê hatibû kirin de ji ew kesên bêbiryar mabûn ji sedî 20`ê wan diyar kirine ku ew dê dengê xwe bidin DTP`ê.

HÊVIYA JI BO PÊŞEROJÊ
Di anketa meha sibatê de pirsa, "Gelo alîkariyên AKP belav dike bandorê li ser dengên we dike?" bû. Ji sedî 97`ê beşdarî anketê bûn, diyar kirin ku bandorê li ser dengên wan nake. Ji sedî 3`yê wan jî diyar kirin ku bandorê dike. Cardin pirsa "Tirkiye dê di nav salekê de ber bi başiyê ve biguhere?" ji hêla ji sedi 48`ê beşdaran ve bi neyînî hate bersivandin. Hemwelatiyan diyar kir ku Tirkiye dê ber bi xirabiyê ve biçe. Koordînatorê Lêkolînê Sosyolog Murat Akdag, diyar kir ku di anketa meha çileyê de xwestine helwesta hilbijêran tespît bikin. Akdag, da zanîn ku di anketa meha sibatê de jî ligel tercîha siyasî xwestine hêviya wan a hilbijartinê û daxwazên wan a giştî tespît bikin. Akdag, destnîşan kir ku derbarê hilbijartinê de tercîha hilbijêran ji sedî 70`ê wê her tim net e, lê ji sedî 30`ê bêbiryar e û ev bêbiryar li ser encaman bandorek mezin dike. Akdag, anî ziman ku ev yek jî 30 û 90 rojên dawî li gor pêşketinên siyasî û xebatên partiyan kişf dibe. Akdag, derbirî ku bi taybetî berî 20 rojên dawî biryar zelal dibe. Akdag, wiha got: "Me sedî 4 payê xetayê da lêkolîna xwe. Li gorî encama van du anketan derketiye holê, divê mirov helwesta gel a li dijî bûyerên siyasî û civakî ku diqewimin, baş analîz bike. Divê daxwazên welatiyên ku li bajarên tirkan dijîn ên li bajarên kurdan baş bên fam kirin."

DAVOSÊ FAYDE NEKIR
Li ser mijarê Akdag, diyar kir ku sedema zêdebûna dengên DTP`ê ew e ku helwesta Serokwezîr Recep Tayyîp Erdogan a li Davosê li ser welatiyên heremê bandorek neyînî kiriye. Akdag anî ziman ku hemwelatî pirsa, "Tu ji bo Filistînê ev qas hewil didî çima ji bo herêmê û kurdan tiştek nakî?" dikin. Akdag, ev tişt gotin: "Helwesta Erdogan a li Davosê bandora li ser welatiyên heremê din a Tirkiyeyê kirî li ser kurdan nekiriye. Erdogan ji bo parastina mafên gelê Filîstînê dewletên cîhanê hilda hemberê xwe. Lê li herêmê ew qas bandor nekir. Heta bandorek neyînî kir. DTP`ê cotestandardiya wî ya li hemberî pirsgirêka Filistîn û kurdan nîşan da." Akdag, anî ziman ku Erdogan li aliyekî Hamasê wek vîna Filîstînê dibîne û muxatab digire, li aliyê din jî DTP`ê ku li ser navê kurdan siyasetê dike, veder dike û destê wan nagire. Akdag, wiha pê de çû: "Welatiyên ku vê nakokiyê dibînin, sempatiya li hemberî Erdogan a beriya 22`ê tîrmehêterk dikin."

GEL AŞTIYÊ DIXWAZE
Akdag, destnîşan kir ku di lêkolîna li tevahiya Tirkiyeyê tê kirin de, pirsa hêviya we ya ji siyasiyan çiye bi piranî bersiva `Beydakirina kar` tê dayîn û wiha domand: "Lê li herêmê ev yek diguhere. Ji sedî 49`ê welatiyan aştiyê û aramiyê dixwazin. Di navginekî ku qeyran ewqas kûr bûye de li Wanê rêjeya ku dibêjin `betalî` ji sedî 24 e. Divê em van encaman baş bixwînin. Ligel qeyrana aborî dîsa welatiyên vir aştî û aramiyê dixwazin." Akdag, wiha dawî li axaftina xwe anî: "Ligel qeyranê, encamek wiha li Wanê derket, eslê xwe welatiyên herêmê misyonek çewa didin hilbijartinê derdixe holê." (DÎHA)

Ji Azadiya Welat hatiye girtin