AMED

Hevserokê Giştî yê DBP'ê Kamuran Yuksek da zanîn ku dewletê dizanibû ku her 3 jinên Kurd ên siyasetmedar sivîl û birîndar in û tevî hemû hewldanên wan her 3 jin hatine înfazkirin û got: "Dema we xwe gihand van kesan birîndar bûn û we bi îşkenceyê qetil kir. Waliyê Şirnexê hevalên me yên birîndar qetil kirine."

Hevserokên Giştî yên Partiya Demokratîk a Gelan (DBP) Kamuran Yuksek û Emîne Ayna, der barê qetilkirina 3 siyasetmedarên jin, Endama PM'ya DBP'ê Sêvê Demîr, Hevseroka Meclîsa Gel a Silopiyê Pakîze Nayîr û Aktîvîsta KJA'yê Fatma Uyar de, li avahiya Navenda Giştî ya DBP'ê civîna çapemeniyê lidarxistin. 

Hevserokê Giştê yê DBP'ê Kamuran Yuksek, destnîşan kir ku ji meha Tîrmehê heya niha 215 sivîl ji aliyê dewleta AKP'ê ve hatiye qetilkirin û got "Em bi hikumeteke kujer re rû bi rû ne." Yuksek, der barê qetilkirina 3 siyatmederan jin ên Kurd jî agahiyên girîng ên ku destnîşan dike ku hatine înfaz kirin, bi raya giştî re parve kir. 

Yuksek da zanîn ku dema endama PM'yê Sêvê Demîr û koma li gel wê xwestine ji Taxa Karşiyakayê derbasî Taxa Yeşiltepeyê bibin rastî êrîşê hatine û wiha axivî: "Dema derbas dibin ji aliyê leşker û polîsan ve têne gulebaran kirin. Ev kom 8 kes in. Ji nav komê hevalekî me yê birîndar di saet 19.35'an de li hevserokê me yê navçeyê digere û dibêje ew birîndar in. Me jî ev agahî bihîst û em ketin nav hin hewldanan. Em bi riya Serokwekîlê Koma HDP'ê Îdrîs Baluken re, bi Wezîrê Karên Hundir û Musteşarê Cemaweriyê re ketin têkiliyê. Ev hevdîtina me saet di 21.30'an de pêk hat. Piştî hevdîtinê, rayedarên ku li me vegeriyan diyar kirin ku li rayedarên herêmî geriyane û rewşek bi vî rengî tune ye, herêma ku tê behskirin herêma pevçûnê ye û daxwaza me hate rekirin. Ji me re gotin tu sivîl birîndar nebûye. Ev rewş bi saetan berdewam kir. Saet derdora 01.00'an de ambulansa şaredariyê diçe û cenazên 3 hevalên me yên jin digire. Di nav vê demê de we çi kir?"

'Bi îşkence hatin qetilkirin'

Yuksek da zanîn ku raporên otopsiyê yên her 3 jinên siyasetmedar di destên wan de ye û wiha berdewam kir: "Ev hevalên me di wê rewşê de ne ku rûyê wan nayê nasîn, teşhîsa wan nayê kirin. We çi kir? Nexwe dema we xwe gihand van kesan birîndar bûn û we bi îşkenceyê qetil kir. Waliyê Şirnexê hevalên me yên birîndar qetil kiriye. Rastî ev e."

Yuksek, di dawiya axaftina xwe de bi van gotinan banga berxwedanê li gelê Kurd kir: "Ez bang li her bajar, navçe, gund û bajarokan dikim ku bertek nîşan bidin. Êdî dem e ku bu berxwedanekê bêdem û giştî ev were rawestandin. Ez bang li hemû saziyên demokrat dikim ku li hemberî hikumeta faşîst eniya demokrasiyê ava bikin."

Pişt re Hevseroka Giştî ya DBP'ê Emîne Ayna axivî û got tespîta nasnameyên her 3 jinên Kurd, 2 rojan ajotiye. Ayna da zanîn ku deriyê morga Nexweşxaneya Dewletê ya Şirnexê ku cenaze anîne ji aliyê tîmên taybet ve hatiye qefilkirin.

Ayna got ku derbarê merasîma cenazê her 3 siyasetmedarên jin bernama hê nehatiye zelal kirin û ew li bendê ne ku malbat werin û bi wan re zelal bikin. 

Piştî daxuyaniyê rêvebirên DBP û KJA'yê ji bo cenazeyan çûn Şirnexê. Tê payîn ku cenaze bînin Amedê. 

KJA: Emê şînê negirin

Her wiha KJA'yê (Kongreya Jinên Azad) ji bo her sê siyasetmedarên jin daxuyanî da û got: "3 kulîlkên me yên azadiyê hatin qetilkirin."

Endama Koordînasyona KJA'yê Sara Aktaş diyar kir ku ewê şîn negirin û wiha axivî: "Di asta herî bilind de, bi çalakiyên herî radikal emê xwedî li têkoşîna wan derkevin. Dikarin sê kulîlkên ji darên wan biqetînin lê nikarin hatina biharê asteng bikin. Nikarin hatina azadiyê asteng bikin."  

DÎHA

**

Nûçeya eleqedar:

- 3 jinên kurd hatin kuştin