Ferîd Demîrel*

Wekî kevneşopiyeke; dem bi dem nivîskar û rojnamegerên xelkê, ji bo kesên ku derdikevin betlaneyê lîsteyên pirtûkan amade dikin û wekî pêşniyar pêşkêşî wan dikin. Beriya betlaneya havînê di rojnameyan de, di malper an jî blogên wêjeyê de mirov rastî van lîsteyan tên.
Îsal Diyarnameyê jî (nizanim salên borî tiştekî wisa kiribû yan na?) lîsteyek bi vî awayî amade kir û bi sernavê "Nivîskarên kurd pirtûkan pêşniyar dikin" nûçeyek belav kir. Li ser daxwaza edîtorê malperê Cemîl Ogûz wekî kesekî hewl dide nasnameya (di wateya rih û pisporî ya rojnamegeriyê de bikar tînim nasnameyê) rojnamegeriyê bi dest bixe, min jî pêşniyarên xwe nivîsandin. Min pêşî wekî nivîsek li dû wê jî lîsteya pêşniyaran nivîsand. Ji ber ku formata nivîsê bi awayê belavkirina lîsteyê bû, hevokên min nehatin weşandin.
Li ser pêşniyara Oguzî min nivîsa xwe carek din girt dest, piçek din berfireh kir û ez dixwazim pêşkêşî we bikim.
Her çiqas ku lîsteyeke ji sê pirtûkan pêk tê hatibe xwestin jî ez ê hinekî sînoran derbas bikim û zêdetirî sê pirtûkan pêşniyar bikim.
Ev demeke bala min li ser wan pirtûkan e ku ji soranî ber bi kurmancî ve tên wergerandin. Niha jî ez heman şêwe pirtûkan dixwînim. Di vê betlaneyê de divê yek du ji van pirtûkan bêne xwendin. Yên Bextiyar Eliyî (bi taybet jî Apê min Cemşîd Xan ku hertim bê ew li ber xwe dibir) û Ferhad Pîrbalî divê bên xwendin. Weşanxaneya Avestayê û hin weşanxaneyên din ev demeke pirtûkên van her dû nivîskaran ji bo kurmancan didin wergerandin.
Pirtûka Jana Gel a Îbrahîm Ehmedî (Avestayê di salên derbasbûyî de ev pirtûk çap kiriye, lê her wiha di nava weşanên Komalê de jî çapeke kevn heye) û yên Eta Nihayî jî dikarim pêşniyar bikim.
Weşanxaneya Peywendê par pirtûkek gelek hêja çap kir. Abdulla Peşêw helbestvanekî gelekî hêja yê soranî ye ku hîna li heyatê ye. Peywendê bi navê "Şevnameya Şaîrekî Têhnî" dîwana Peşêw çap kiribû. Hêjayî xwendinê ye.
Weşanxaneya Lîsê par romana Yaqob Tilermenî ya bi navê "Hêlange" weşandibû. Ev pirtûk jî divê di nava lîsteya xwendinê de be.
Yeka din jî heye ku ez nebêjim nabe; "Nûbar - Yekemîn Hîkayeyên Kurmancî Yên Modern" ya Wezîrê Nadirî. Ji hêla Nûbiharê ve hatiye çapkirin û niha di nava lîsteya min de ye ku ez ê bixwînim. Dîsa Lîsê jî demeke berê di heman çarçoveyê de pirtûkên kurdên Sovyeta berê bi tîpên latînî çap kiribû. Ew jî di nava lîsteya min a xwendinê de ne.
Wekî teoriya wêjeyê pirtûka Remezan Alanî a bi navê "Destpêkek ji bo Zanista Edebiyata Modern" ji nava Weşanên Peywendê derketibû, wekî pêşniyar ez dikarim li ser vê lîsteyê zêde bikim.
Herî dawî jî helbestên Fatma Savciyê divê di nava lîsteyê de bin.

*Ferîd Demîrel rojnamegerekî kurd e û niha wekî edîtorê Beşa Kurdî ya Bîanetê kar dike 

**

Nivîsa eleqedar:

- Nivîskarên kurd pirtûkan pêşniyar dikin