Diyarname

Ji bo şermezarkirina tecrîda li ser Rêberê PKK'ê Abdullah Ocalan îro ji bajarên wekî Stenbol, Enqere, îzmîr û Amedê li dor 200 parêzerî çûn Gemlîka Bursayê ku ev der hemberî Girava Îmraliyê ye. Ji 27'ê tîrmeha 2011'an ve dewlet nahêle Ocalan û parêzerên wî hevdîtinê pêk bînin. Parêzeran bi awayekî giştî ji bo çûyîna Îmraliyê serî lê dane lê careke din destûr nehat dayîn. Parêzer Ebru Gunay û Serhan Eren çûn avahiya serfermandariya jendirmeyan û daxwaza xwe anîn ziman lê dîsa destûr nedan.

Paşê li ser navê Komeleya Hiqûqnasên Mezopotamyayê û Komeleya Hiqûqnasên Azadîxwaz pankarta "Ji bo tecrîda li Îmraliyê na, ji bo Ocalan azadî" vekirin û daxuyanî dan. Li ser navên wan parêzer Pinar Akdemîr daxuyanî xwend. Akdemîr got ku 208 heftene nahêlin bi muwekîlê xwe re xeber bidin, bi awayekî kêfî qede dikin û got: "Ne tenê nahêlin parêzer û malbat herin serdanê, di heman demê de mafê telefonkirinê ya malbatê, mafê xwe gihandinê jî asten dikin ku bi vî awayî Ocalan tekane girtiye ku li Tirkiyeyê ji van mafan fêdeyê nagire."

Akdemîr got ji ber rewşa Îmralî nexweşiyên cuda yên bi Ocalan re derketine jî ji ber derfetan nayên dermankirin, lewma ev nexweşî pêşdikevin û wisa dom kir: "Tecrîd kuştineke polîtîk e ku bi vê tecrîdê dixwazin girtî ji civakê dûr bimîne, bi temamî îzOle bibe û bê ji bîrkirin. Mînak herî dawî li Tirkiye, Kurdistan û li hemû dinyayê 10 mîlyon û 328 hezar îmze ji bo azadiya Ocalan hatin berhevkirin û pêşkêşî Konseya Ewropayê kirin. Di dawiyê de dewlet mecbûr e vê rastiyê bibîne."

Parêzeran xwest Ocalan ne tenê bi malbatê re di heman demê de bi endamên saziyên sivîl re, bi rojnameger û rewşenbîran re bê ba hev. Parêzeran di dawiyê de banga xwedîlêderketina aştiyê û vîna çareseriya demokratîk kir û piştî daxuyaniyê bi otobusên ku çûbûn wir vegeriyan.