Diyarname

Hilbijartinên li sê Kantonanê Rojava îro serê sibê dest pê kir û heta saet 20'an dê bidomin. Gel eleqeyek mezin nîşanî hilbijartinê da.

Ji sê herêman (Efrîn, Firat, Cizîr) û di 5 kantonan de 12 hezar û 421 kes ji bo hevserokatiya 3 hezar û 732 komînan bûn berendam. Serê sibê de dengdayîn dest pê kir.  Welatiyên Kantona Girê Spî yên kurd, ereb, tirkmen û ermen beşdarî hilbijartinê bûn.

Ev yekemîn hilbijartina herêmî ye ku li Rojava-Bakurê Sûriyeyê li dar dikeve. Li wir jî rêveber wekî hevserok têne hilbjartin. Ev gava yekemîn a hilbijartinê ye û di meha yekemîn a 2018'an de jî dê hilbijartina ji bo Parlemena Bakurê Sûriyeyê li dar bikeve.

Serê sibê de Ronahî TV bi awayekî zindî hilbijartin weşand û ligel hilbijêran hevpeyvîn kir.

Partiyên di bin banê ENKS'ê de beşdarî hilbijartinê nebûn û ew boykot kirin. Lê tê gotin ku gelek kesên ji endamên van partiyan jî çûn cem sindoqan û deng dan. 

Asayişa Rojava ji bo hilbijartinê ewlehiyek mezin girt û heta ev nûçe hat amadekirin jî di hilbijartinê de tu pirsgirêk derneketibûn.

Di vê navberê de ajansa mezin a navneteweyî Reuters jî hilbijartin şopand.

Kesên Reutersê ligel wan hevpeyvîn kirine gotin: "Em şiklê jiyan, polîtîka û aboriya xwe hildibijêrin." Rênas Ehmed ê 25 salî ku ji bo Reutersê axiviye gotiye, "Ev roj rojeke dîrokî ye."

Mihemed Mûrad Xelîl ê temenê wî li dor 50'ye jî wisa gotiye, "Ev 60 sal in bêyî nasnameya me ya hemwelatî hebe em jiyan. Me nefes nedigirt, mafên me hatibûn astengkirin. Lê êdî em ne di wê dema ku me bigirin bin zordariyê de ne."

Naser al-Jasim ê temen li dor 45'an ku ew bi xwe ereb e diyar kiriye ku gundê wan jî ketiye hilbijartinê û gotiye; "Ji bo pêşketina xizmeta herêmî min dengê xwe da. Berevajî kesên teng difikirin ez dibêjim di navbera kurd û ereban de ferq nîn e, ji bo vê ez çûm cem sindoqê min deng da."

**

Nûçeya Eleqedar:

- Ji bo 3732 komînan 12421 berendam dikevin hilbijartinê