Amed
CHP li Amedê nikare berendamekî bibîne. Hate îdîakirin ku CHP'ê bi Tanrikulu re xeber daye.

Li ser vê yekê Serokê Baroya Amedê yê berê Sezgin Tanrikulu îro daxuyaniyeke nivîskî weşand û got: "CHP bi min re xeber nedaye. Di hilbijartina herêmî de bi tu awayî ez nabim berendam, ezê xebatên xwe yên li ser hiqûq û mafên mirovan bidomînim. Min bi tu partiyeke siyasî re hevdîtin çênekiriye."

Di vê navberê de hate gotin ku wekî AKP'ê CHP jî li Amedê kesek ji bo berendamtiya Şaredariya Bajarê Mezin a Amedê nabîne. Hate îdîakirin ku CHP'ê ji bo berandamtî heta niha bi 13 kesan re hevdîtin çêkiriye û di nav wan de Prof. Dr. Halil Degertekin, mebûsê berê Muhsin Koçyigit, parêzer Mahmut Şevketoglu, parêzer Fuat Demir, karsaz Adnan Erbil, hunermend Kadri Goral û Bedri Ayseli jî hene.

Her wiha serokê CHP'a Amedê Muzaffer Deger da zanîn ku rayedarên walîtî û rêveberên AKP'ê mal bi mal digerin amûrên teknolojîk ên malê belav dikin, pirsa pêdiviya sarincok, televîzyon, makîneyê cilşo dikin, komir, êzind û diyariyan belav dikin.