Diyarname
Dayikek ji dayikên kurd. Yeka zana, jîr, dilbirehm... Dayikek ku ji bo bûyîna gelek zarokan pîriktî kiriye; gelek bûkên ciwan ji ber destên wê re derbas bûne, bi wan destên hoste bêyî ku zehmetiyê bikişînin, bêyî tiştek bi zarokên wan bê zarok anîne dinê... Û heman dayik; gelek jinên li gund piştî mirinê ji aliyê wê ve hatine şûştin û wê bi wan destên xwe ew dane axê. Dayikek ku ku zarokan bi dîtina wê çavên xwe li dinyayê vekirine; heman dayik, ku jinên ji vê dinyayê xatir xwestine dîsa li ber destên wê cara dawî ava li vê dinyayê li wan hatiye kirin û ew sipartine axê... Li gelek bajarên kurdan gelek dayikên wisa hene. Û dayika Aso jî yek ji wan e. Niha li ser dayika Aso belgefîlmekî bi navê "Şilfîtazî" hat kişandin. Belgefîlm ji aliyê Zekeriya Aydogan ve hatiye kişandin û niha belgefîlm di çarçoveya 8'emîn Rojên Belgefîlman a Stenbolê Documentarist de hat nîşandayîn.
Dayika Aso 75 salî ye, du pîşeyên wê yên cuda hene û hê jî bi van pîşeyan xizmeta gundiyên xwe dike. Ew ne ji bo pereyan, tenê ji bo alîkariyê, ji bo kêfxweşiya mirovan hewl dide. Di 30 salên dawî de bi dehan zarok bi destên wê hatine dinê. Jinên ducanî ku dixtoran jî nekarîne fêm bikin ka pirsgirêka wan çi ye, dayika Aso pirsgirêka wan tehlîl kiriye û ji bo wan bûye çare. Jinên ku xatir ji vê dinyayê xwestine jî wesî kirine ku ew dayik bê wan bişo û bide axê. Û kurê dayika Aso Zekeriya Aydogan ku bi salan bûye şahidê vê keda dayika Aso niha li ser wê belgefîlmekî serketî kişandiye. Belgefîlmê ku carinan ber bi vesazkirinê ve diçe jî, lê bêyî temaşevanan aciz bike, xwe bi wan dide temaşekirin. Belgefîlm di çarçoveya Documentaristê de hat nîşandayîn û rastî eleqeyek baş hat. Ji bo temaşekirina çîroka dayika Aso, cihek hûn rast lê hatin miheqeq temaşe bikin.
KUNYE:
Nav: ŞİLFÎTAZÎ
Derhêner-Senaryo: Zekeriya Aydoğan
DOP: Semih Yildiz
Vesazkirin: Eyup Zana Ekinci, Erhan Ors
Muzîk Mehmûd Berazî
Sala Kişandine: 2014
Mawe: 47 deqe
Ziman: Kurdî
**
Nûçeyên eleqedar: