NAVENDA NÛÇEYAN / ROJNEWS

Endamê pêwendiyên derve yê KCK'ê Demhat Egîd diyar kir ku pêşmergeyên PDK-Î xwestin li herêmên di bin kontrola gerîlayan de bi cih bibin û wiha got: “Pêşmergeyên PDK-Î xwestin bi niyetek xirab û bi awayekî veşartî li herêmên di bin destê gerîlayan de bi cih bibin. Me jî çend caran ew hişyar kirin.” Egîd diyar kir ku hinek çapemeniya Başûr dixwazin bûyerê proveke bikin û wiha got: “Em ne alîgirê nearamiyê ne. Em bang li PDK-Î dikin ku di demek herî kurt de vê meseleyê çareser bikin.”

Endamê pêwendiyên derve yê KCK'ê Demhat Egîd derbarê rastiya bûyera li herêma Kelaşîn a di navbera gerîlayên HPG û pêşmergeyên Partiya Demokrata Kurdistanê-Îranê de ji bo RojNewsê axivî: “Em naxwazin di navbera me û PDK-Î de pirsgirêkek derbikeve. Daxwaz ji me kirin ku herêmên me ji bo derbasbûnê bikarbînin. Me jî ev daxwaza wan pejirand û ji wan re got, kî dixwaze dikarin bên û derbas bibin. Lê me dît niyeteke wan a din heye. Bi niyetek xirab xwestin herêmên gerîla lê ne, xwe bi cih bikin. Me ev nêzîkatî manîdar dît û çima ev herêma gerîla lê ne, dixwazin lê bi cih bibin.”

Pêşmergeyên PDK-Î zext li gel dikin

Demhat Egîd wiha dom kir: “Me dît pêşmergeyên PDK-Î zext li gel dikin û pere ji wan werdigirin. Bi zorê gumrik werdigirtin û pêşiya qeçaxçîtiyan digirtin. Hêzên me yên leşkerî di vê derbarê de ew hişyar kirin ku ji vê herêmê derbikevin. Gotibûn em dixwazin herêmê bikar bînin, lê me dît ew bi armancekî din û li pey ajogeriyekê (provakasyon) ne. Me bi rêya pêwendiyan û kesên dost çend caran ew hişyar kirin ku nekevin nava van hewldanan. Em bawerin hinek hêzên din li herêmê hene û dixwazin provakasyonan çekin û bi taybet jî di vê qonaxê de.”

Naxwazin aramî çêbibe 

Endamê komîteya pêwendiyên derve yê KCK'ê diyar kir ku ew naxwazin ne aramiyek çêbibe û wiha got: “Em alîgirê aramiyê ne. Lê hinek kes naxwazin aramî çêbibe. Ji bo vê yekê jî tevgerek wiha kirin. Hêzên me çend caran ew hişyar kirin, lê hêzên wan çend caran bi awayekî veşartî xwestin xwe bixin di herêmê de.”

Em naxwazin ev mesele mezin bibe

Derbarê şer û îdîayên kuştina 2 pêşmergeyên PDK-Î ji aliyê gerîlayan de jî Demhat Egîd wiha got: “Egera wê yekê heye îro pevçûnek ji bo hişyarbûnê çêbûyî be. Em encama rast nizanin û agahdariyeke me ya zelal li ser vê yekê nîn e. Ew bi xwe wisa dibêjin û hinekî reklamê jî dikin. Em ne alîgirê wê yekê ne ev mesele zêdetir mezin bibe. Em dîsa ji berpirsên PDK-î re dibêjin, divê vê meseleyê di demek herî kurt de çareser bikin û divê ev hêzên wan ji vir derbikevin. Ger dixwazin ji bo rojhilatê Kurdistanê tekoşînekê bikin, gelek herêmên hêzên gerîlayan lê nîn e, hene. Çima ev herêm hatiye hilbijartin, em zêde wate nadin vê yekê. Dikarin biçin cihek din baştir xebata xwe bidin meşandin.”

Kes nikare li ser dijmintiya PKK'ê bibe hêz

Demhat Egîd anî ziman ku tu kes nikare dijmintiya PKK'ê bike û wiha got: “Kesek nikare li ser dijminî û dijberiya PKK'ê, li Kurdistanê bibe hêz. Ev siyasetek şaş e. Divê dest ji vê siyasetê berdin.”

PDK-Î tehrîk dikin

Derbarê berevajîkirina bûyerê ji aliye hinek dezgehên ragihandinê yên başûrê Kurdistanê ve jî Demhat Egîd wiha got: “Çapemeniya wê yekê dike, derdikeve holê ku hêzekî cudatir li pişt heye. PDK-Î tehrîk dikin û em bawer nakin ev hêza PDK-Î be. Ji ber diyar e kîjan rêyê bikartînin. Em di vê yekê de bi guman in. Ew çapemenî jî, xizmeta van provakasyonan dikin.”

Divê çapemeniya başûr ji bo aramî û çareseriyê rolê xwe bilîze

Demhat Egîd bang li çapemeniya başûrê Kurdistanê kir û wiha got: “Em çapemeniya ku rastiyê berevajî dikin, hişyar dikin. Ji bo vê meseleyê mezintir nekin û nebin sedemê provakasyonê. Ango ji şer zêdetir, şerxwaziyê pêş nexin. Divê çapemeniya Başûr ji bo aramî û çareseriyê rolê xwe bilîze.”

Demhat Egîd derbarê serdana şanda Yekîtiya Parlamenterên Kurdistanê ya ji bo Qendîlê jî wiha got: “Ev şande ne taybet li ser vê mijarê ye û berê randevu hatibû dayîn. Lê dibe ev mesele jî were guftûgokirin.”