Enqere
Heskîfiyan ji ber ku Swêd, Almanya û Avusturya piştgiriya didin Bendava Ilisûyê û dê Heskîf di bin avê de bimîne serîlêdana îltîcayê kirin.
Welatên wekî Swêd, Almanya û Avusturya ji bo çêbûna Bendava Ilisû piştgiriya aborî didin. Bendava Ilisû dema çêbe dê Heskîfê û gundên derdorê noqav bike. Di encamê de bi deh hezaran kes bê cih û war bimîne. Heskîfiyan jî ji bo balê bikişînin ser vê yekê li Enqereyê ji bo îltîcayê serî li balyozxaneya van welatan dan. Koma bi piştgiriya Hewildana Jiyandina Heskîfê li Kugulu Parqeyê Enqereyê hatin cem hev û bi pankartên "Dest nedin Heskîfa me", "Yên axa me ji me distînin berpirsên pêşeroja me ne", "Pêşeroja me ji me nestînin", "Almanya, Avusturya û Swêd dewlemend in em xizan" û "Îltîca" ber bi Balyozxaneya Almanyayê ya Enqereyê meşiyan.
Di meşê de mebûsê DTP'ê yê Batmanê Bengi Yildiz jî, nûnerên rêxistinên civakî, hawirparêz jî amade bûn.
Li ber Balyozxaneya Almanyayê Erkan Tatvan axivî û got ku Heskêf mîrateyeke dîrokî ya hemû cîhanê ye û wiha berdewam kir: "Em xwedî li vî mîrateyê dernekevin dîrok dê me bidarizîne. Divê hemû cîhan li Heskîfê xwedî derkeve. Ez ji welatên ku piştgiriyê didin çêkirina bendavê dipirsim: Ev bajarê kevnare li welatê we ba we yê destûr bida bendaveke wisa? Em baş dizanin ku we destûr nedida."
Tatvan destnîşan kir ku ger bi pereyên welatên Swêd, Almanya û Avusturya Heskîf di bin avê de bimîne em hemû ji bo îltîcayê emê serî li van welatan bidin.
Di çalakiyê de hate estin ku ev dewlet piştiriya xwe bi paş ve bikişînin.
Parlementerê DTP'ê yê Êlihê Bengî Yildiz jî got ku Heskîfê qorbanê polîtîkayên enerjiyê yên çend salan dikin. Yildiz wisa got: "Serokwezîr Recep Tayyip Erdogan di demên dawî de hemû pêşveçûnên biçûk jî wekî 'Sûceke mirovahiyê' rave dike. Em jî dibêjin sûcê li hemberî mirovahiyê yê herî mezin ji holê rakirina Heskîfê ye ku Heskîf ji romayiyan bigire heta eyyubî û artukogullarî bûye warger û dîrokeke mezin di nava xwe de dihebîne."
Yildiz bang li rayedaran kir ku bên vî sûcê mirovahiyê nekin û got: "Heskîfê dikin qurbanê polîtîkayên enerjiyê. Ev nêrîna kapîtalîmza hovane ya sedsala 19'emîn e. Divê her kes xwedî li Heskîfê derkeve."
Piştî daxuyaniyê komekê dosyaya îltîcayê ku amede kiribûn pêşkêşî rayedarên Balyozxaneya Almanyayê kir. Kom piştre bi Balyozgerên Swêd û Avusturyayê re jî axivîn û xwestin ew piştgiriya ku didin ji bo çêkiriya bendavê bi paş ve bikişînin.