Diyarname
Xelata Nobelê ya Aştiyê îsal serokomarê berê yê Finlandiyayê Martti Ahtisaari digire.

Xwediyê Xelata Nobelê ya Aştiyê jî diyar bû. Serokomarê berê yê Finlandiyayî bi peywira nûneriya Neteweyên Yekbûyî li Kosovayê kar kir, ji bo li herêma Endonezyayê li Açeyê aştî di navbera gerîlayan û hikumetê de pêk bê bar girt ser milê xwe û di encamê de bi van xebatan îsal Xelata Nobelê ya Aştiyê didin wî.
Ji bo vê xelatê îsal 197 berendam hebûn û di dawiyê de xelata bi 1,4 mîlyon dolarî bû ya Ahtisaari.

Ji bo pirsgirêka kurd got dema min nîn e

Li Finlandiyayê di adara sala 2008'an de di civîna çapemeniyê de jê hate pirsîn ku dikare ji bo pirsgirêka kurd bikeve nava hewldanan an a Martti Ahtisaari wisa bersiv da: "Ji min gelek kes alîkarî dixwaze lê niha dema min nîn e. Ez niha zêdetir li ser pirsgirêka Kosovaye dixebitim. Ez hêvî dikim dê hin dest bavêjin pirsgirêka li Tirkiyeyê ya navborî û ev pirsgirêk jî bi awayekî çareser bibe."