Rênas Jiyan

Merheba! Dîroka dinyayê pirtûkeke çikûs e, zû bi zû rûpelên xwe ji her bûyerê re venake; ji bo ku mirov xwe di dîroka dinyayê de bide qeydkirin hewce ye ku mêranî û fedakariyeke mezin bike. Berxwedana Kobanî bûyereke “dîrokî” ye û ne gengaz e ku dîrok xwe di ser vê bûyerê re biqevize, lê divê neyê jibîrkirin ku di herba Kobanî de wekî kurd me tu hesabê “dîrok”, “dewlet” û "cennet”ê nekir, me hesabê “rûmet”ê kir, me hesabê “medeniyet”ê kir û ew qas. Me bi herba Kobanî nehişt ku “etîk”a gerdûnî bin pê bibe. Herba Kobanî, da peyitandin ku dinyayeke bêkurd dinyayeke “kêm” e, ger li dinyayê kurd tune bin eniya ronahî û mirovahiyê li hemberî tarîtî û barbariyê kêm û qels e. Ji ber dîrok û koka xwe ya agir û ronahiyê heta ku kurd hebin wê li dijî tarîtî û barbariyê tê bikoşin welewkî bê dewlet û bê derfet bin jî. Şerê li hemberî “tarîtî” û “barbarî”yê, yê ji bo parastina mirovahiyê, li vê dinyayê, “qeder” û “peywir”a kurdan e, kurd ji bo vê yekê hene û divê her tim hebin.

***

Ne karê her mêrî ye ku “destvala” li hemberî “barbarîzm”ê li ber xwe bide. Li milletekî bifikirin ku bê dewlet e, bê derfet e û bê çek e û dîsa jî şer dike û welatê xwe û mirovahiyê radestî “serjêkar”an nake.

***

Ji 1187’an herba “Hîttîn”ê ya serkeftina Selaheddînî û bi vir ve cara yekem e ku kurd bi herba “Kobanî” dîsa derdikevin ser dika dîrokê. Îcar ji herba Hîttînê cudatir dost bûbin dijmin û dijmin bûbin dost jî kurd wekî xwe mane û dîsa wekî di Hîttînê de rêya başî û etîkê hilbijartine. Herba Kobanî ji xeynî herbeke siyasî di heman demê de têkbirina psîkolojiya bindestiyê ye jî, kurdên ku heta berî Kobanî ji xwe û ji nirxên xwe bawer nedikir êdî wê dest bi baweriyê bikin, ger mirov “bawer” neke nikare tu “serkeftin”an bi dest bixwe. Bi herba Kobanî me kurdan “neteweperwerî” û jê jî girîngtir me metodolojiya “yekitî”yê nas kir; em kurd êdî em ê çêtir zanibin ku yekitî bi kîjan alav û navgînan tê sazkirin. Me kurdan bi herba Kobanî ne bi tenê me “xwe” û “hêz”a xwe nas kir, her wiha me “dost” û “dijmin”ên xwe jî nas kirin û di heman demê de dost û dijminên me jî em û hêza me nas kirin. 

***

Herba Kobanî, qirdê kurdan ê mîrî dîsa rakir ser lingên wî, êdî qirdê kurdan wê dîsa bilîze. Piştî Kobanî tu kurd wê ne kurdê berê be, wê ji berê zêdetir bi xwe bawer û wê ji berê zêdetir nêzîkî azadiyê be. Wekî ku Weber dibêje; “Herbek dikare rihê miletekî ji nû ve paqij bike”. Bi herba Kobanî rihê kurdan ê “bindest” paqij bû. Herba Kobanî “çirûsk”a bawerî û azadiyê ye.

07.12.2014, Azadiya Welat