Gever

Li Geverê di salvegera kuştina 3 kurdan de careke din polîsan bi guleyan berê xwe da gel û ciwanekî bi navê Rojhat Ozdel qetil kirin û birîndar jî hene.

Di rojên 6-7'ê berfanbara 2013'yan, yanê salek berê piştî xirakirina gorên aîdê HPG'yiyan gel derketibû qadê û bûyer şermezad kiribû. Di wan çalakiyan de polîsan gule bera gel dabûn û di encamê de  M. Reşît Îşbîlîr û Veysel Îşbîlîr* hatibûn kuştin. Di merasima cenazeya Îşbîlîran de jî polîsan dîsa êrîş kiribû û vê carê Bêmal Topçu** hatibû qetilkirin. Di salvegera kuştina van her sê kurdan de îro Gever li ser piyan bû. Lê polîsan carek din êrîş kir. Di êrîşa îro de Rojhat Ozdel ê 18 salî bi guleya polîsan hat qetilkirin.

Şahidên bûyerê dibêjin ku li ser Rêya Îpekê, li hemberî Han Petrol û Yuksekova Dershanesi hêzên taybet ên polîsan bi çekên lûle dirêj gule bera Rojhat Ozdel dan. Ozdel bi guleya ku li binçengê wî ket birîndar bûn. Ozdel rakirin Nexweşxaneya Dewletê ya Gaverê lê nekarî wî li jiyanê vegerînin.

Polîsan nexweşxane dorpêç kir û pêşî li ketin û derketina nexweşxaneyê girt. Bi ser bihîstina bûyerê re rêveberên DBP, HDP, mebûsê HDP'ê Esat Canan û gelek kesên din çûn ber nexweşxaneyê.

Li ber nexweşxaneyê li ser êrîşa polîsan a li ser gel mebûsê HDP'ê Esat Canan bertekek tûj nîşan polîsan da û got: "Li tu derê Tirkiyeyê tiştek wisa nîn e. Çawa hûn nahêlin mebûsekî bikeve hundir. Polîs dibêjin dê niha dest biavêjin çekan. Wê çaxê dest biavêjin. Dewletek nikare hemwelatiyê xwe bikuje. Em vê êdî bizanin. Êdî wisa nekin. Ger hûn wisa bikin em herin alî xwe, hûn herin anî xwe. Wêç axê çi diqewime bila biqewime. Ma em bibêjin dewlet xurt e, dikuje bila bikuje? Di salên 90'î bi xwe de tiştekî wisa tune bû."

Her wiha Walîtiya Culemêrgê li ser bûyerê daxuyaniyek da û îdîa kir ku piştî bi çek êrîşê Lojmanên Edliyeyê hatiye kirin bûyer derketine. Şahidên bûyerên dibêjin tuştek wisa tune ye û her wiha Lojmanên Edliyeyê û cihê bûyer lê qewimiye gelek dûrî hev in.

Karker jî rastî êrîşê hatin

Di vê navberê de Serwîza Çêkirina Xirabûnan a VEDAŞ'ê (elekrîtk) ku ji wir re derbas dibû bû hedefa kapsulên bombeya gazî ya polîsan. Di bûyerê de karker Îlker Aslan ji çeneyê xwe birîndar bû ew rakirin nexweşxaneyê.

* Mehmet bi 6, Veysel Îşbîlîr jî bi 2 guleyan hat kuştin!

** Bemal Tokçu wefat kir