QAMIŞLO

Endamê Komîteya Dîplomasî ya Desteya Bilind a Kurd (DBK) û Endamê Dîwana Meclisa Gel a Rojavayê Kurdistanê û TEV-DEM’ê Îsa Huso di encama êrîşek bombeyî ku di wesayîta wî de hatibû bicîhkirin de, jiyana xwe ji dest da.

Îsa Huso dema ku serê sibehê saet der dorên 06.00’an ji mala xwe ya li taxa Kornîş a Qamişloyê derket û ji bo ku biçe karê xwe li wesayîta xwe siwar bû, teqîn pêk hat. Di encama teqînê de wesayît hilweşiya û Huso jî jiyana xwe ji dest da. Di dema teqînê de jinek ku wê demê ji wir derbas dibû jî birîndar bû.

Li gor agahiyên hatin li bin wesayîta Huso bombe hatibû bicîhkirin û dema wesayît nêzî 3 metreyan ji malê dûr ketiye ji dûr ve hatiye teqandin. Piştî teqînê hêzên Asayîşê hatin cihê bûyerê û tedbîrên berfireh girtin. Her wiha li cihê teqînê lêkolîn hate destpêkirin.

Piştî lêkolînên li cihê bûyerê cenazeyê Îsa Huso rakirina Mizgefta Qasimo ya li Taxa Xerbî. Piştî agahiya êrîşê hate bihîstin, bi dehan welatiyan berê xwe dan Mizgefta Qasimo. 

Cenazeyê Huso wê saet di 17.00 de li Goristana Şehîd Delîl Saruxan bê definkirin.