Amed
Konferansa Yekîtî û Çareseriyê ya bakurê Kurdistanê ku li Amedê îro dest pê kir dê sibê bi dawî bibe. Li ser navê Kongreya Civaka Demokratîkê (KCD) Hevserok Aysel Tugluk axivî û wisa got: "Girîngiya dîrokî ya vê konferansê ne tenê ji pirrengiya civatê, tê. Di serdema kaotîk a Rojhilata Navîn de, ji bo pêşeroj û azadiya gelê xwe, em li ser pirsgirêkên xwe nîqaş bikin, li ser navê xwe çareseriyan biafirînin û biryarên xwe bi xwe bidin, em civiyane. Girîngiya mezin a civînê, ji rojev û ji îradeya civînê tê.”

Vane ji gotinên Tugluk çend not:

- Bi rihê biratiyê, bi îradeyeke yekîtiya neteweyî û bi hişmendiyeke kûr; nûnerên hêja yên gelê kurd, kesayetên pêşengên civakê, jin, ciwan, kal û pîr û ji her beş û birên civakê, ji bo nivîsîna dîrokeke nû em hatine gel hev.
- Em vê civînê gelekî girîng û hêja dibînin. Di vê platforma yekîtiya neteweyî de; her nijad, bawerî û raman bi awayekî azad temsîl dibe. Divê qet şik û guman tune be ku di Kurdistana azad de, wê kurd, ermen, asûrî, ereb, tirk-tirkmen; misliman, xiristiyan, Êzdî; sunnî, elewî û hwd. her beşên civakê bi azadiyeke rastî bijîn.”

- Rêberê Gelê Kurd Birêz Abdullah Ocalan, di Newroza îsal de, bi daxuyanî û banga xwe ya dîrokî, pêvajoyeke nû da destpêkirin. Pêvajoya nû ji bo Kurdistanê û Rojhilata Navîn bû sedema moral û bi hêvîbûna yekîtî û çareseriyê. Ev pêvajoya nû, ya ku wekî “Pêvajoya avakirina jiyana azad û rizgariya demokratîk” tê binavkirin, helwesteke stratejîk e. Bi vê pêvajoyê re, şer hatiye rawestandin, gerîlla vekişiyaye başûrê Kurdistanê û bi vî awayî xwîn hatiye sekinandin. Hêviya çareseriya demokratîk, ji xewn û xeyalan, wergeriyaye rastiyê.”

- Li Rojhilata Navîn şer hatine pêşxistin. Li hember pêşveçûnên ku li Rojhilata Navîn diqewimin peywira me ew e ku em bi rihê tifaq û yekîtiyê derkevin holê û em bi vî awayî tevbigerin. Em bawer dikin ku, aştiya mezin jî, hêza çareseriyê jî, dê bi vê yekîtiyê derkeve holê.

- Balafirên şer ên Dewleta Tirk, li Roboskiyê 34 gundiyên kurd qetil kirin. Serokwezîr Tayyîp Erdoğan, piştî tevkujiyê, li pêş çavên dinyayê, eşkere Serfermandarê Artêşê pîroz kir û spasiyên xwe pêşkêşî wî kir. Careke din bi zelalî diyar bû ku Tayyîp Erdoğan û partiya wî AKP, dev ji neyartiya kurdan bernedaye. Kurdên berxwedêr û AKP di her qadê de li hember hev bûn. Saleke dijwar a berxwedanê li pêşiya kurdan bû. AKP’ê bi baweriya ku wê karibe îradeya gelê kurd bişkîne, hêza xwe ya polîs û leşkerî heta dawiyê bi kar anî. Belê berxwedanên mezin ên li çiyayan, li zîndanan û li qadên gund û bajaran mohra xwe li salê xist.”

- Tifaqa gelê me ya Rojava, hêza xwe ya berxwedan û sekneke demokratîk afirandiye û bandora xwe li her parçeyên Kurdistanê kiriye. Tevî her zor û zehmetiyan, gelê me yê Rojava berxwedana xwe didomîne. Em careke din gelê xwe yê Rojava, berxwedan û şoreşa gelê xwe yê şanaz, bi coşeke mezin silav dikin û em bi tevahiya hebûna xwe, piştgiriya xwe îlan dikin. Hêvî û daxwaza me ew e ku tevayî rêxistin û hêzên me yên siyasî li her parçeyên Kurdistanê, di vî warî de berpirsiyariyên xwe xurtir bînin cih û destekê bidin gelê me yê Rojava.”

- Konferansa me xwediyê îrade û îddiayeke girîng e. Konferansa me, dê bi encamên konferansên din ên ji bo çareserî û yekîtiyê pêk hatine û wê pêk werin hevdu temam bikin.

- Em ê li ser erdnîgariya xwe ya ku di dîrokê de bûye dergûşa şaristaniyê, mafê xwe yê avakirina rêvebiriya xwe bi xwe bi dest bixin. Em ê mafê xwe yên demokratîk, ekolojîk, aborî û jiyana azad, bi dest bixin û em ê li ziman û çanda xwe xwedî derkevin. Em ê di nav malbata mirovahiyê de, cihê xwe yê bi rûmet bigirin.

- Werin em bi îradeyeke xurt, êş û elemên ku bi gelê me dane kişandin bi dawî bînin. Em jiyaneke azad û rizgariya demokratîk diyarî gelê xwe bikin.

***

Nivîsên eleqedar:

- Ocalan: Ya rast jiyanek azad, bi rûmet û wekhev e

- Yaşar Kemal bang li kurd û tirkan kir