Amed
Di Civîna Giştî ya KCD'ê de Hevseroka KCD'ê Aysel Tugluk gotina "Lazime hemû mafên kurdan werin mîsogerkirin. Mafê perwerdehiya zimanê zikmakî ji bo kurdan mafekî jêveneger e. Gelê kurd mafê perwerdehiya kurdî û parastina bi kurdî dixwaze. Dersa hilbijartî bila ji bo tirkan bidin dayîn. Ji bo kurdan ev nabe”, Hevserokê din Ahmet Turk jî wisa got: "Me salên, 80,90 û 95’an dît. Wê demê we nekarî rê li ber vê têkoşînê bigirin. Hûn niha jî nikarin. Ger îro em baş bi nirxînin sed sala 21’ê ji bo kurdan wê gelek tiştan û serkeftinan bîne.”

6’emîn Civîna Giştî ya Kongreya Civaka Demokratîk li salona Vedat Aydin a li avahiya Rêxistina BDP’a Amedê bi tevlibûna Hevserokên KCD’ê Ahmet Turk û Aysel Tugluk, nûnerên Partiya Çareseriya Demokratîk (PÇDK) Şerva Mihemed, Pervîn Hesen, Nûnera Tevgera Jinan a Başûrê Kurdistanê ROJAK Berîvan Mihemed, Nûnerê Tevgera Hemwelatiyên Azad ya Başûrê Kurdistanê Serdar Star, parlamenterên û şaredarên BDP'ê, nûnerên rêxistinên civaka sivîl, siyasetmedarên kurd ên ji parçeyên Kurdistanê, mele, Seyda û gelek oldaran dest pê kir. Li dor 800 kes û delege beşdarî civînê bûn.
Hevseroka KCD’ê Aysel Tugluk piştî rêzgirtinê axaftina destpêkê kir.

‘POLÎTÎKAYÊN AKP’Ê TÊK ÇÛN’

Tugluk, di destpêkê de destnîşan kir ku di vê pêvajoyê de yekîtiya kurdan gelek girîng e û lazime kurd bi projeyekê yekîtiyê bersiv bidin vê pêvajoyê. Tugluk, got ku ev 100 salin kurd bê statu hatine hiştin û di sedsala 21’emîn de êdî kurd vê rewşê qebûl nakin. Tugluk wiha dom kir: “Gelek zelal e ku tu projeyên çareseriya pirsgirêka kurd yên AKP tune ne. Ew hê bi çend gavên xapînok dixwazin înkarkirina kurdan bidomînin. Lazim e hemû mafên kurdan werin mîsogerkirin. Mafê perwerdehiya zimanê zikmakî ji bo kurdan mafekî jêveneger e. Gelê kurd mafê perwerdehiya kurdî û parastina bi kurdî dixwaze. Dersa hilbijartî bila ji bo tirkan bidin dayîn. Ji bo kurdan ev nabe.” Tugluk da zanîn ku polîtîkayên AKP'ê yên li hemberî kurdan têk çûne û wiha got: “Polîtîkayên AKP’ê li Îmraliyê, li Newrozê û li Şemzînanê têk çûn.”

Tugluk bal kişand ser operasyonên KCK’ê jî û got, “Wan digot ji xwe bi girtina siyasetmedaran wê tevgera siyasî ya kurdan têk biçe. Lê wan nekarî tevgera kurdan têk bibin.”

‘13 SAL E LI ÎMRALIYÊ ÎŞKENCE TÊ KIRIN’

Tugluk di berdewamê de li ser girankirina tecrîda li hemberî Rêberê PKK'ê Abdullah Ocalan ku ev zêdetirê 400 roj in bi parêzer û xizmên xwe re nayê cem hev û got ku AKP bi vî şiklî dixwaze çaresernebûna pirsgirêka kurd kûr bike. Tugluk der barê mijarê de ev tişt got: “Ev 13 sal in li Îmraliyê pergala îşkenceyê tê jiyandin. Ocalan ne girtiyek ji rêzê ye. 3,5 mîlyon kurdan ew wekî îradeya xwe ya siyasî eşkera kiriye. Lazim e di zûtirîn demê de tecrîd were rakirin û rê li ber aştiyê bê vekirin. Dîsa lazim e protokolên di pêvajoya Osloyê de hatine nivîsîn bêne qebûlkirin û rêyên diyalogê cardin bên vekirin.”

Tugluk, her wiha silav li Şoreşa Rojava jî kir û silavên xew ji bo PYD û tevgera siyasî ya kurd şand.

‘HÛN BÊ MINET IN’

Tugluk, li ser mijara rakirina destnedayîna parlamenterên BDP’ê jî sekinî û wiha axivî: “Em amede ne ku bedel pêwîst be di vê rêyê de emê bidin. Lê gelo ey desthilatdar hûn ji bo wê amade ne. Hûn bê minet in ku em sindoqê deynin ber gel ka kî wê ji sindoqê derkeve. Ji xwe heta niha rêyên siyaseta demokratîk ji kurdan re girtîbûn. Em her tim têkoşîna vê didin.

‘BIHARA WAN VEGERIYA ZIVISTANÊ’

Piştî Tugluk, Hevserokê KCD’ê Ahmet Turk jî axafî. Turk wisa got: “Li Rojhilata Navîn dibêjin ‘Bihara Ereban’ diqewime. Lê dema mirov li pêvajoya Sûriye û Lîbyayê dike, xuya dibe ku ‘Bihar’ vegeriyaye ‘Zivistanê’. Lê ev rewş ji bo kurdan derbasdar nîn e. Gelê kurd li Rojhilata Navîn bê navber têkoşîna xwe didomîne. Îro roj, roja yekîtiya kurdan e. Ez bang li hemû kesî dikim ku vê yekîtiyê ava bikin. Tirsa Erdogan jî ji vê yekîtiyê ye. Piştî Rojava wê dor were Rojhilat. Hemû tirs ji ber vê ye. Têkoşîna kurdan ji bo gelên Rojhilata Navîn jî gelek girîng e. Jixwe Birêz Ocalan Konfederalîzma Demokratîk ya Rojhilata Navîn ji bo vê pêşniyar kir. Ji ber wê jî azadiya Birêz Ocalan ji bo gelan gelek girîng e. Tu kes wekî wî rê nade siyaseta Rojhilata Navîn.”

‘TU HÊZ NÎKARIN TÊKOŞÎNA ME ASTENG BIKe’

Turk, di berdawemê de got ku tu kes û tu hêz nikare rê li li ber têkoşîna azadiya kurdan bigire û wiha got: “Me salên, 80,90 û 95’an dît. Wê demê we nekarî rê li ber vê têkoşînê bigirin. Hûn niha jî nikarin. Ger îro em baş bi nirxînin sed sala 21’ê ji bo kurdan wê gelek tiştan û serkeftinan bîne.”

Piştî axaftina Turk, Nûnerê PÇDK’ê Şerva Mihemed û yê Tevgera Hemwelatiyên Azad ya Başûrê Kurdistanê Zana Kaya plaketek dan Turk û Tugluk. Piştî plaketdayînê Nûnera PÇDK’ê peyama PÇDK’ê xwend.

Her wiha di kongreyê de peyama Parlamenterê BDP’ê yê Amedê Hatîip Dîcleyê ku di çarçoveya operasyonên bi navê KCK’ê de hatiye girtin jî hat xwendin.

Kongre du rojan didome