Nê rojan Koşkê Cemîl Paşayî de “Tîyatroyê Bajarê Amedî” kayê “Mem û Zîn” kay kerd.
Şima heme destana Mem û Zîne zanê. Şima wendoxî tena nê, hema-hema her kurd zano. Xora her kurd bi na destane çimanê xo akerdo û akeno û do akero zî. Mijara na destane, mijara eşqî ya. La esas destane, çarçewayê eşqê Mem û Zîne de ciwîyayîşê ê wextan û rewşa sosyale û kulturê komela ê deman mojnena ma. Na destane hetêk ra tarîxî ya. Hetêk ra kulturî ya.
Mîyanê ma kurdan de hema zî heme tema û rengê na destane bi aweyêko şîretî bi awayêko meteforî yeno vatiş. Kesê ke yewbînî ra zaf hes bikerê bi meteforê heskerdişê Mem û Zîne yenê namekerdiş. Zaf rey zî mîyanê komele de merdimanê xayînan ra, ê fesadan ra, merdimê ke şarî pêveradanê, înan ra zî vanê, Beko, Bekoyo Fesad.
Seke mi va destane de di karekterê bingeyênî estî. Yew karekter yê Mem û Zîn o. No karekter de eşqêko pak, heskerdişêko saf û sade yeno vînayîş. Yew karakter zî yê Beko yo. Beko fesad o karkterê merdimanê xirab, hesud û dirîtîyan mojneno.
Bêguman çend kareketerê bînî zî estê. Mesela karekterê Tajdînî. Merdim nê karekterî de bawerî û zerrî ra paştîdayîşî û yê dostanîye vîneno.
Na grûba tîyatroyî, bi westayîyêka pîle na destane adapteyê tîyatroyî kerda. Reya verên a eke yew kay Tirkîya de teberê sehneyî de mîyanê temaşekerdoxan de û yew mekan de kay keno. Yanî ma şikenê vajî Tirkîya de “Kayê Mekanî” hewa ewilî tîyatroyê kurdan kay kerdo.
Tîyatro heme mekanê na Koşka Cemîl Paşayî kerde yew sehne û bi meharetêko zaf pîl kayê xo domna.
No tîyatro promîyerê kayê xo roja 10’ê aşma gulane de kay kerd. Hetanî ewro zî Dîyarbekir de û Koşkê Cemîl Paşa de 12 rey û reya peyêne zî roja 25.06.2014 de kay kerd. Mi bi xo reya yewedesîne de temaşe kerd. O wext zî nêzdî panc sey kesî amebî. Hetanî roja peyêne zî hûmara temaşekerdoxan vera-vera zêdîyêne.
Goreyê vatişanê berpirsîyarê tîyatroyî, no kay do demêk kayê xo bivinderno. Qederêk ra dima tîyatro do reyna dest bi kaykerdişî bikero. Kay do şoro tebrê Dîyarbekirî û tayê bajaranê pîlan de zî kay bikero. Hetanî ke do şoro teberê Tirkîya zî.
Nuştoxê nê hunerê muhteşemî Kawa Nemir o.
Birêz Ruknettîn Gun zî derhênerîya nê kayî kerda. Na grûba tîyatroyî nê new-des aşmîyê ke nê kayî ser şuxulîyenê. Rolê Memî, Elî Tekbaşî kay kerd û Rolê Zîne zî Zelal Gokçe îcra kerd.
Kay hetê şeklî ra sere ra hetanî peynî hema-hema ma şikenê vajî bêqusur bi. Mekan pêro sey yew sehne ame şuxulnayîş. Heme cayê nê koşkî; serê banî, no hewşo gird, heme berî, heme pacayî sey yew sehne amey xebitnayîş. Kincê înan ra bigêrin heme nê cayî û heme çîyê bînan rinda-rind goreyê manaya na destane amade bibi.
Labelê hetê zereyê xo de (îçerîk) ganî rexnegirê tîyatroyî nê kayî goreyê zanayîş û vînayîşanê xo tehlîl bikerê û vînayîşanê xo bi şarî reyde pare bikerê.
Mi sere de zî nuşt, na destane hetê Kawa Nemirî ra newe ra nusîyaya. Labelê çend manena orjînalîya xo ez bi xo nêzanê. Çunke yew destanêka sey Mem û Zîn ke mora edebîyatê kurdan hesebîyena gereka orjînalîya xo vindî nêkera. Amadekerdişê sey nê huneran merdim şeklê ci senî bi xesasîyetêko pîl amade keno ganî merdim hetê manaya xo ra zî, hetê orjînalîya xo ra zî hende xesas bibo.
.jpg)
.jpg)
.jpg)
.jpg)
