.jpg)
Maka hemû cureyên wêjeyê helbest; qasî em pê dizanin hezar û dused sal e li Kurdistanê bi kurdî tê lêkirin.
Yekoyek bi nirxandina hin helbestkaran em bi serdema helbesta kurdî ya klasîk bi hay in û helbet bi lihevkomkirina antolojiyan bi hemû helbestkarên xwe jî dizanin.
Piştre qonaxa Hawarê tê, dîsa bi nirxandina hin navan kêm-zêde em bi wê qonaxê jî agahdar in. Her wiha, bi nirxandineke hêja pirtûka Îrfan Amîda ya bi navê “Qonaxeke Modernîzma Kurdî Helbesta Tirêjê” jî li ber destê me ye.
Balam çendîn wisa nav bi nav an a hin serdem hatibin nirxandin jî, lê bi awayekî giştî nirxandin û pênaseya helbesta kurdî nehatiye kirin; bi taybetî ya helbesta kurdî a serbest!
Bi awayekî giştî wekî destpêk ji dema Tirêjê heta Rewşen, Rewşenname, piştî du hezarî wekî pêl di navbera rûpelên kovarên wekî W, Nûbihar, Tîroj, Çîrûsk û hwd. li bakur helbesta serbest a li ser koka helbesta beriya xwe klasîkê şaxdayî, vega wekî; ‘poetîka, polîtîka, ziman, nasname, ligel-lidij’, li ku destpêkir, li ku ye û ber bi ku ve diçe?
Bi taybetî piştî salên nodî, duhezarî û duhezar deh-pazdehan her sal wekî pirtûk di wêjeya me de helbest her li pêş e. Ji çend helbestkaran em guhîştine bi sedan navan.
Balam hin tişt hene em hê jî jê bêhay in; em pê nizanin kîjan helbestkarê/a me xwedî kîjan poetîkayê ye, helbestkarê/a cureyê kîjan helbestê ye; lîrik, rexneyî, post-modern, polîtîk, çarîn, evîn, pastoral, romantîk, epîk û hwd?!
Hê em pê nizanin kîjan helbestkarê/a me hoste û nûnerê kîjan helbestê ye; kî li ser şopa kê ye?!
Her wiha, bi xwendin, werger û têkîliya helbesta kurdî ya serbest bi ya parçeyên me yên din re, bi ya cîhanê re çi ye, di çi astê de ye; ango têkîliya wê ya bi helbesta zimanên din re çi ye; bandorê lê dike yan bin bandorê de ye!?
Erê helbestkarên me ji alî xwendeyên kurmancî ve pir hendik tên zanîn, nasîn; lê heyf û mixabin, (îstîsna ne tê de) ji ber bandora popîlîzmê û magazînê navê wan li ber helbesta wan tê zanîn!..
Bi min êdî ev dem e, bi awayekî giştî divê nirxandin û pênaseya helbesta kurdî ya serbest (piştî salên nodî) were kirin; li ku dest pê kir, vega li ku ye û berê wê bi ku ve ye..!
Haya min jê hebû, berî vê bi salan hoste û rûspiyê min Berken Bereh dest avêtibû xebateke wisa, lê nizam encam çi bû! Hêvîdar im bi ser ve nehêle, bi encam bike.
Divê êdî yên xwe têrê dibînin dest bavêjin xebateke wiha, da em û xwende pê bizanibin, helbesta me ya serbest ji ku dest pê kir, li ku ye, ber bi ku ve diçe; kîjanê bi kê destpêkir, kî hosteyê kîjanê ye; ji kîjan poetîkayê dizê?
Ji bo vê pêdiviyê; bo hem xwende serboriya vê qonaxê bizanibe hem nifşê ciwan hay ji yên beriya xwe hebe; bi hay jêbûnê karibe gavên bi pêşdetir bavêje; da dengvedan û geşedana helbesta kurdî sînorên li pêş in bihore…
Da pirs hate kirin bê bersiv nemîne; em û xwende bizanibin ‘filan’ helbestkarê/a me yê/a helbestên wî/ê pir tên xwendin çi cure helbestê dinivîse! Yan kîjan cure helbesta serkeftî ya kîjan helbestkarê me ye…
Ne ku em navên helbestkarên jê hez dikin ji ber rêz bikin, lê divê em bi cure û poetîka helbest-kariya wan jî bizanibin!!!
Bo êdî em nebêjin filan kes helbestkarê/a kurd e, bo em bêjin filan helbestkarê helbesta me ya ‘polîtîk, pastoral, rexneyî, romantîk, çarîn, evînî, mînîmal, epîk-destanî û hwd. e…
Çiku em nizanin kîjan helbestkarê/a me helbestkarê/a çi cure helbestê ye!
Ji loma jî dem e were nirxandin, bi nirxandinê re ji hev were veqetandin û pênasekirin.
.jpg)
