Tê zanîn, îsal 110'emîn salvegera rojnamegeriya kurdan e. Heta niha hin nivîs li ser vê rojê hatin nivîsîn. Yek ji wan jî Mem Mîrxan e ku di quncikê xwe de nivîsî (Azadiya Welat, 23.04.2008).
Mîrxan li ser rojnamegeriya bi tirkî û ya bi kurdî sekiniye. Ya tirkî jixwe ne meseleya min e, lê li ser ya kurdî ku Mem Mîrxan çend tişt şaş gotine, divê wekî bicihatina edaletê ez bersivekê bidim.
Mîrxan wisa gotiye; "Ji bilî beşa kurdî ya DÎHA’yê nûçegihanên ku bi kurdî nûçeyan biafirînin tune ne."
Ma wisa dibe Mem?
Ma çapemeniya kurd a li Tirkiyeyê tenê beşa kurdî ya DÎHA'yê ye?
Ma tenê beşa kurdî ya DÎHA'yê nûçeyên bi kurdî saz dike?
Kesek nizane li nivîsa te binêre dê bêje qey rast e Mem.
Ez dizanim tu jî dizanî, lê dîsa jî ez ji te re hema çend navan ji Diyarnameyê bidim ên ku bi kurdî nûçeyên xwe saz dikin: Cemil Oguz, Dawud Rêbiwar, Zekî Ozmen...
Mem, tu gazincên xwe ji kurdan, siyasetmedarên kurdan dikî û dibêjî, "Çapemeniya kurd hem ji hêla yên ku çapemeniya bi tirkî dişopînin, hem jî ji yên ku qaşo çapemeniya kurdî dişopînin wekî çapemenî, wekî çavkanî nayê dîtin". Digel ku tu jî dizanî Diyarname bi nûçeyên xwe hem ji bo rojnameyên kurdan, hem jî ji bo malperên kurdan bûye çavkaniyeke bingehîn, dîsa tu vê nabînî, yan jî te ji bîr kir... Tiştên ku tu jê gazincan dikî ku 'çapemeniya kurdî nayê dîtin' tu bi xwe jî nabînî. Ez wekî din çi bibêjim...
Di ciheke din de tu wisa dibêjî, "Piraniya kesên ku di çapemeniya kurdî de dişixulin di nav kar de rojnamegeriyê hîn dibin. Heta hîn dibin an rojname tê girtin an ew deriyê rojnameyê digirin û berê xwe didin rexekî din."
Bi ya min tiştê ku herî zêde li ser bê sekinîn û tiştê ku çapemenî dike çapemenî jî ev e.
Çima temenê rojnamegerekî kurd kêm e di nav çapemeniyê kurd e? Çima yan ew dest ji kar ber dide, yan tê qewirandin?
Ev ji bo qunciknivîskarên kurd jî mînakek baş e. Li rojnameya tirkan Milliyetê binêrin, qunciknivîskarên wan hene ku ev 40 sal in li heman cihî, heman rûpelî dinivîsîn...
Bi ya min pirsgirêka sereke ya rojnamegeriya kurd di van xalan de ye.
Çima çapemeniya kurd nikare xwedî li zarokên xwe derkeve?
Di nav çapemeniya kurd de rojnamegerên kurd nikarin bi pereyên ku digirin debara xwe bikin. Jixwe her tişt ji vir dest pê dike.
Û heta çapemeniya kurd nikaribe xwedî li zarokên xwe derkeve, heta rojnamegerên kurd nikaribin bi karên ku dikin debara xwe bikin dê ev pîşe hem amator bimîne, hem jî dê 'wekî çavkanî neyê dîtin'.
Bi ya min pirsgirêk çend alî ye; Hem ji rojnamegerên kurd diqewime, hem ji rêveberên rojnameyê û di dawiyê de jî ji hereketên ku piştgirî didin vê weşanê.
Hin pirsgirêkê dixin stûyê xwendevanan ez wisa nafikirim...
Weshasil, hêviya me ew e ku çapemeniya me jî wekî ya xelkê bibe çapameniyeke xurt, bi qîmet, rojnamegerên me bikaribin jê debara xwe bikin...
Û noteke dawî: Bêşik ji aliyê zimanê nûçeyê ve heta nêzîktêdayîna li çavkaniyan, heta alîgirtina rêxistin û kesan, heta nêzîktêdayîna qunciknivîskaran gelek pirsgirêkên çapemeniya kurd hene, car caran jixwe li ser em disakinin...
.jpg)
.jpg)
.jpg)
.jpg)
