DIHOK

Di navbera TEV-DEM û ENKS'ê de hevpeymanek hat îmzekirin. Di hevpeymanê de biryar hatiye standin ku lêvegerîneke kurdî were avakirin, hemû alî beşdarî Rêveberiya Xweseriya Demokratîk bibin û piştgiriya xebatên parastinê yên li rojavayê Kurdistanê bikin.

Ji bo eşkerekirina encamên civînên ev 9 roj in li bajarê Dihokê yê başûrê Kurdistanê di navbera nûnerên TEV-DEM û ENKS'ê de didomin îro li bajarê Dihokê ji bo ragihandina hevpeymana di navbera her du aliyan de civîneke çapemeniyê hat lidarxistin.

Di civîna çapemeniyê de daxuyaniya TEV-DEM û ENKS'ê ya ji bo çapemeniyê ji aliyê Endamê Desteya Rêveber a TEV-DEM'ê Aldar Xelîl ve hat xwendin.

Di daxuyaniya çapemeniyê de wiha hat gotin: "Êrîşên çeteyên DAIŞ'ê yên li dijî herêmên kurdan ku bi armanca tunekirina hebûna neteweyî ya gelê kurd tên kirin. Li ser vexwendina Serokê Herêma Başûrê Kurdistanê Birêz Mesûd Barzanî ji 14 heta 22'yê kewçêrê di navbera şandeyên TEV-DEM û ENKS'ê de bi çavdêriya nûnerê Serokatiya Başûrê Kurdistanê Hemîd Derbendî civîn tên lidarxistin. Di civînan de her du aliyan hemû doz û mijarên girêdayî gelê kurd û doza kurdî gotûbêj kirin."

Di berdewamiya daxuyaniya çapemeniyê de wiha hat gotin: "Ji ber girîngiya yekîtiya helwesta kurd ji TEV-DEM, ENKS û partiyên derveyî herduyan lêvegerînek Kkurd hat avakirin. Ev lêvegerîn wê setratejiya giştî ya kurd xêz bike û di hemû alî û mijarên girêdayî gelê kurd, Rojava û Sûriyeyê yekîtiya helwesta kurd diyar bike."

Di daxuyaniyê de bal kişand ser beşdarbûna ENKS'ê di nava Rêveberiya Xweseriya Demokratîk û desteyên wê de û wiha hat gotin."Biryar hat girtin ku hevkariyeke aktîf û parvekirineke rasteqîne pêk were. Her wiha divê şêwazê niha yê rêveberiya herêmên kurdî were pêşxistin û di aliyê siyasî û îdarî de yekîtiyekê çêbike. Ji bo temsîlkirina hemû pêkhateyên din ên rojavayê Kurdistanê jî divê kar bênavbera were kirin."

Girêdayî mijrara parastinê di daxuyaniya çapemeniyê de hat zanîn ku her du alî dibînin ku parastina herêmên rojavayê Kurdistanê erka hemû welatiyan e û di civînan de jî xebatên parastinê û fedekariya mezin a Yekîneyên Parastina Gel bi nirx hatin binavkirin û biryar hatiye girtin ku her du alî piştgiriya xebatên parastinê bike.

Di dawiya daxuyaniyê de hat gotin ku encamên van civînan ji bo gelê kurd mizgînî ye û  ji bo berxwedana Kobanê jî diyarî ye, her wiha ji bo piştgiriya herêma başûrê Kurdistanê ya bi berxwedana Kobanê re spasiya Serokê Başûrê kurdistanê hatin kirin.