NAVENDA NÛÇEYAN

Fermandariya Biryargeha YPG'ê got ku wê Kobanê tu carî nekeve û got: "Li Kobanî wê berxwedana sed salê pêk were. Tunebûn û têkbirina DAIŞ'ê wê li Kobanî dest pê bike. Her kolanek, her malek Kobanî wê ji bo wan bibe goristan." 

Fermandariya Biryargeha Yekîneyên Parastina Gel (YPG) der barê berxwedana li Kobanê de daxuyaniyek weşand û destnîşan kir ku ketina Kobanê ne mimkûn e.

'EM Ê BERPIRSYARIYÊN XWE BI CIH BÎNIN'

Fermandariya Biryargeha YPG'ê bibîr xist ku êrîşên çeteyên DAIŞ'ê yên di 15'ê rezberê de bi armanca dagirkirina Kobanî hatine destpêkirin di roja xwe ya 18'emîn de dewam dikin û diyar kir ku komên çete ji her sê eniyên Kobanî bi çekên giran êrîş dikin û dixwazin pêş bikevin. Fermandariyê diyar kir ku çawa YPG'ê ev 3 sal in li Rojava, ji Efrînê heta Cezaayê parastina gelan û nirxan kiriye, wê ji niha û pê de jî derfet û şert çi dibin bila bibin, berpirsyariyên xwe yên dîrokî bicih bîne.

'WÊ KOBANÊ JI BO DAIŞÊ BIBE GORISTAN'

Di daxuyaniya fermandariyê de wiha hat gotin: "Bila gelê kurd û dostên me qet meraq nekin, wê Kobanî tu caran nekeve. Ketina Kobanî qet û qet ne mimkûn e. Li Kobanî wê berxwedana sed salê pêk were û wê Kobanî, ji bo DAIŞ'ê re bibe goristan. Tunebûn û têkbirina DAIŞ'ê wê li Kobanî dest pê bike. Her kolanek û her malek Kobanî wê ji bo DAIŞ'ê bibe goristan. Berxwedana li derdora Kobanî mezin dibe û wê DAIŞ bixîne, têk bibe."

XEWN Û XEYALÊN HIN DERDORAN PÊK NAYÊN

Fermandariyê di daxuyaniya xwe de bal kişand ser îdîa û nûçeyên bêbingeh ên hin dezgehên çapemeniyê ku ev 18 roj in îdîa dikin Kobanî ketiye destê DAIŞ'ê û nerazîbûn nîşanî van îdîayan da.  Di vê der barê de jî fermandariyê got: "Ev tişt ne rast e. Xewn û xeyalên hin derdoran wê pêk neyên. Em wekî YPG, ji bo têkbirina DAIŞ'ê û pêk anîna serketinê her tiştê pêwîst dikin. Bila baş bê zanîn; Em ê DAIŞ di deşta Kobanî de bişkînin û serketina rojavayê Kurdistan û ya Sûriyeya Demokratîk û Azad ji tevahî cîhanê re îlan bikin."

Fermandariya Biryargeha YPG'ê bang li hemû ciwanên Kurdistanê û ciwanên wekhevî û azadîxwaz kir û got: "Werin tevlî hêzên me bibin. Xwedî li berpirsiyariyên xwe yên dîrokî derkevin. Li hember êrîşên hov ên DAIŞ'ê tevlî tekoşîna mirovahiye bibin."