STENBOL 

Hevserokê HDP'ê Selahattîn Demîrtaş çû serdana hevalên karkeran ên ku di çêkirina rezîdansa li Mecîdiyekoyê de mirin û wiha bang li hikumetê kir: "Carekê jî derkevin bi rûmet îstîfa bikin û ji karkeran lêborînê bixwazin. Bila kesên ev gora kevir çêkirin baş bizanin em dê vê dinyayê li wan teng bikin."

Êvara 6'ê mehê 10 karkerên ku li rezîdansa Torunlar GYO Holgindê dixebitîn di encama ketina asansorê ya ji 32 qatan de jiyana xwe ji dest dan. Mebûsên HDP'ê di cih de li ser bûyerê sekinîbûn. Îro jî Hevserokê HDP'ê Selahattîn Demîrtaş, Mebûsên HDP'ê Ertugrul Kurkçu,

Halîl Aksoy û rêveberên HDP û DBP'ê çûn cem karkerên ku hevalên di bûyerê de mirin. Karkeran bi diruşmên "Taşeronkî xebitîn mirin e", "Bila pergala taşeronê qedexe bikin" û "Karkerên avahiyan ne kole" pêşwazî li Demîrtaş kirin.

'50 hezar caran şîrketa we xirab bibe'

Demîrtaş, karkerên jiyana xwe ji dest dan bi bîranîn û sersaxî ji bo malbatan xwest.

Demîrtaş, da zanîn ku êşa mirinan nayê tarîfkirin û diyar kir ku daxuyaniyên xwediyê Torunlar GYO û hikumetê li ser meseleyê rezalet e, wijdana mirovan diêşîne û wiha dom kir: "Li vir karker tên qetilkirin hûn derketine û şerm nakin dibêjin 'bila navê şîrketê qirêj nebe'. 50 hezaran caran şîrketa we xirab bibe. Hezar şîrketên we qurbana her karkerekî me bibe."

'Carekê jî derkevin bi rûmet îstîfa bikin'

Demîrtaş, destnîşan kir ku Tirkiye welatê herî zêde karker lê tên qetilkirin e û wiha axivî: "Di serdema AKP'ê ya 12 salan de 14 hezar karker hatin qetilkirin. Lê piştî her komkujiyê daxuyaniyên 'bila tu tişt li şîrketa me neyên'" Demîrtaş, da zanîn ku li pişt xwediyên şîrketê hikumet heye û hikumet her tim dibêje "em dê tedbîran bigirin û lêkolînan bikin" û ev yek lê zêde kir: "Carekê jî derkevin bi rûmet îstîfa bikin û ji karkeran lêborînê bixwazin. Ey patron, înşallah hûn jî dê rojekê neçar bimînin di avahiyan de bixebitin."

'Emê dinê li wan teng bikin'

Demîrtaş got ku divê karker xwe bi rêxistin bikin û kesên li kar digerin jî divê serî li avahiya Torunlar nedin. Demîrtaş, bilêv kir ku divê bi hev re têkoşînê bikin û wiha dawî li axaftina xwe anî: "Em wekî HDP heya dawî em li cem karker û kesên zor li wan tê kirin in. Kesên li vir bila bizanin ku ji Egeyê heya Culemêrgê em li cem karkeran in. Bila xwe tenê hîs nekin. Bila kesên ev gora kevir çêkirine baş bizanin em dê vê dinyayê li wan teng bikin."

Nûçeya eleqedar:

- 10 karkerên din jî hatin kuştin!