AMED 
Li  Amedê meşa ji bo şermezarkirina êrîşên çeteyên DAIŞ ên li dijî Kobanê rastî êrîşa polîsan hat.Gel bi keviran bersiv dan êrîşa polîsan û dayikên aştiyê li Parka Anit kon vedan.

Amedê, ji bo şermezarkirina êrîşên çeteyên DAIŞ ên li hember Kantona Kobanê, meşek girseyî hat lidarxistin. Hevseroka Kongreya Civaka Demokratîk  Aysel Tugluk, Hevseroka Rêxistina Partiya Herêman a Demokratîk (DBP) a Amedê Zubeyde Zumrut, bi hezaran jin, ciwan û welatî li Parka Koşuyoluyê kom bûn. Ciwanan beriya meşê meşale pêxistin û posterên Rêberê Gelê Kurd Abdullah Ocalan û alên PKK'ê vekirin. Dema girse gihişt Taxa Ofîsê bi sedan polîsan bi wesayîtên zirxî û TOMA’yan girse dorpêç kirin.

Polîsan xwest  girse çalakiya xwe bi dawî bike, lê girseya bi biryar bendên polîsan derbas kirin. Dema girse ket çar rê ya Ofîsê polîsan bi ava şid û bombeyên gazê mudaxele kirin. Ciwanan jî bi kevir û molotofan bersiv dan polîsan û dirûşmayên; "Bijî Serok Apo", "Bijî berxwedana Rojava", "Bijî berxwedana YPG" berz kirin. Pevçûn li her derê semta Ofîsê belav bû. Piştî demekê girse tevî mudaxaleya polîsan jî gihiştin Parka Anitê û derbasî cem malbatên ku zarokên xwe ji hikûmeta AKP'ê dixwazin.

KOBANÊ DILÊ AMEDÊ YE

Li wir Hevseroka Rêxistina Partiya Herêman a Demokratîk (DBP) a Amedê Zubeyde Zumrut axivî got ku ew ji bo  protestokirina komkujiya Kobanê hatine gel hev lê polîsên AKP'ê dîsa êrîşî wan kiriye. Zumrut, da zanîn ku ji destpêka şoreşa Rojava heya niha hêzên emperyalîst û çeteyên wek DAÎŞ'ê êrîşî Rojava kirine û wiha axivî: "Ligel vê jî Rojava li ser piyan ma û li hember van êrîşan li ber xwe da. "Em ê di 19’ê Tîrmehê ber bi sînorê Rojava biçin. Amed dilê Kobanê ye her wiha Kobanê jî dilê Amedê ye. Divê her hemwelatî li Rojava xwedî derkeve."

JI ŞOREŞA ROJAVA DITIRSIN

Hevseroka KCD'ê Aysel Tugluk jî  da zanîn ku gelê Rojava yê ji bo wekhevî û azadiyê têdikoşe li hember çeteyên DAIŞ'ê li ber xwe dide û wiha berdewam kir: "Ew kes û hêzên ku planên wan ên qirêj hene ji şoreşa Rojava ditirsin. Şoreşa ku li ser Rojhilata Navîn wekî stêrkekê dibiriqe hemû planên wan xera dike." Tugluk, anî ziman ku hikumeta AKP'ê divê li hember vîna siyasî ya kurdan rêzdar be û wiha got: "AKP li Sûriyeyê polîtîkaya şer dimeşîne li Tirkiyeyê jî polîtîkaya aştiyê qaşo dimeşîne. Em vê dûritiyê qebûl nakin." Tugluk, herî dawî bang li hemû hemwelatiyên Kurdistan û partiyên siyasî ên Kurd kir ku li hember van êrîşên hovane xwedî Kobanê derkevin.