Amed
Mebûsê AKP'ê yê Amedê Cuma İçten îro bi daxuyaniyeke Rektora Zanîngeha Dîcle Prof. Dr. Ayşegul Jale Saraç tawanbar kir. Saraç di sala 2007'an de ji lîsteya AKP'ê li Amedê bûbû berendama mebûsiyê lê bi ser neketibû. Paşê ligel ku di rêza sêyem de bû jî Serokomar ew ji bo rektoriya Zanîngeha Dîcle tayîn kiribû.
Mebûsê AKP'ê ku heta îro tu rexne li Rektor Saraç nekiribû îro ew bi gelek tiştan tawambar kir. İçten xwest Saraç îstîfa bike. Vane hin gotinên İçten:
- Rektor Prof. Dr. Saraç ji bo 'rêxistina paralel' dixebite.
- 65 caran karên nelirê kiriye.
- Ji roja ku Jale xanim hatiye ser Zanîngeha Dîcleyê ji 80 bajarên din xebatkar aniye zanîngehê. Hûn dizanin ji wan re dibêjin çi? Dibêjin 'Binêre birê min, ez te tînim, lê tuyê sedî 15-20'ê meaşê xwe bidî rêxistina F Tîpî, meaşên wan dan vê rêxistinê yan na? Meaşê kî hat qutkirin? Çend hîndekar ji ser kar hatin dûrxistin?
- Îhaleyên ku dewletê dan zanîngehê çawa û ji bo ku hatin xebitandin? Ev îhale dan kîjan fîrmayan? Eraziyên ku dewletê ji bo zanîngehê pêşkêş kirin dan kîjan fîrmayan? Ev hemû heman nav in?
- Rektor xebatkarê kîjan cemaetê ye? Ger ne di bin fermana F Tîpî Pensilvanyayê de ye wê çaxê bila bibersivîne çend hîndekar ji kar veqetiyan? Ji bo çi? Yan evên veqetiyan neketin bin fermana Pensilvanya loma?
- Di dema ku Sekreterê rastîn heye de, Sabri Eyigun ê sekreterê giştî yê korsan kî ye?
- Berî ezmûnan bi du rojan bersivên pirsên ezmûnê li xebatkarên xwe belav kirin yan na? De, hadê bila bibêjin na?
- Di karên teklîf (pêşkêşî) û vexwendinî de ji bo rêxistina Haşhaşiyan xeraç hat xwestin? Kîjan fîrma mecbûr man xeracê bidin vê rêxistinê?
- Di sala 2007'an de hesabên zanîngehê ji aliyê Sayiştay ve hatin nirxandin û di gelek xalan de nêzî 200 mîlyon, bi pereyê berê 200 trîlyon nelirêtî hate tesbîtkirin. Sayiştan xwest derbarê rêveberî de ku zerar daye wir lêpirsîn bê destpêkirin lê çima nehat destpêkirin?
- Zanîngeha Dîcle navenda rêxistina F Tîpî ye ku doçentan digihîne û dişîne zanîngehên din?
- Di dema pêvajoya çareseriyê de li zanîngehê di navbera xwendekaran de bûyer derketin û ev li Tirkiyeyê belav bûn, di van de para rêveberiya zanîngehê heye?
- Di dema ku em ber bi hilbijartinê diçûn de 900 dar ji bo çi, bi çi armancî hatin birîn?
- Di sala 2011'an de ji bo nexweşxaneyê îhaleya paqijiyê dane dest pê kirin. Di îhaleya yekemîn de îhale bi sedî 9 nehatiye erêkirin, çawa çêbûye ku heman îhale bi sedî 25 hatiye erêkirin. Kesê/a ev erê kiriye kî ye? Û ji vê erêkirinê 500 hezar TL xerac dane rêxistina Tîpa F yan na?
Wekî notek: Mebûsê AKP'ê Cuma İçten ji Çewligê ye, li Amedê li ser navê AKP'ê hat hilbijartin. İçten heta niha ligel Rektora Zanîngehê gelek dan û standine pêk aniye lê heta niha tu rexne nekiriye. Tê gotin ku Saraç ku alîgira Cemaetê ye, ji ber pevçûna Cemaet û AKP'ê İçten niha van gotinan dike.