NAVENDA NÛÇEYAN

Artêşa Tirkiyê piştî “dîwarê şermê” niha jî ji Serêkaniyê heta Dêrikê li ser sînorê Rojava kozik kolan, li ser girên axê tang, top û fuzeyên bicûk bicîh kirin û hejmara leşkeran zêde kirin.

Hikûmeta Tirkiyê ku bi çêkirina “Dîwarê şermê” yê di navbera Bakur û Rojavayê Kurdistanê de, bibû sedema çalakî û nerazîbûnên mezin, ev 2 meh e, ji Serêkaniyê heta Dêrikê li ser sînorê Rojava kozikan dikole, tang, top û fuzeyên biçûk bicîh dike û hejmara leşkeran zêde dike.

Li gorî nûçeyên di hinek saziyên çapemeniyê yên tirk de hatine weşandin jî, artêşa tirk li ser sînorê Nisêbîn û Qamişlo gelek kozik kolan û tang bicîh kirin. Her wiha girên ji axê hatin çêkirin û cihên nobedariyê hatine çêkirin. Dîsa gelek tang, wesayîtên bi zirx ên bi navê kobra ku li ser wan fuzeyên biçûk hene, li qereqolên sînor hatine bicîhkirin.

Çavkaniyên li bajarê Dêrikê jî ragihandin ku, piştî kolandina xendekên ji aliyê rêveberiya Başûr ve, liv û tevgera leşkerên tirk jî zêde bûye.

Çend roj berê Hikumeta Başûr jî li ser sînorê Başûr û Rojava xendek kolandibû û rastî nerazîbûna kurdan hatibû.