Diyarname

Arjen Arî yek ji helbestvanên qedir bilind ê kurd bû ku di 30'yê kewçêra 2012'yan de wefat kir. Niha ji bo bîranîna Arjen Arî pêşbaziya dosyaya helbestê tê lidar xistin. Pêşbaziya yekemîn ku îsal li dar xistin, roja 6'ê mehê merasima xelatdayîna wê hate li dar xistin.

Pêşbazî ji aliyê Weşanên Evrensen, Komeleya Nivîskarên Kurd, Şaredariya Bajarê Mezin a Amedê, Weşanên Lîs, Ronahî, Belkî, Avesta û Enstîtuya Kurdî ya Amedê ve hate lidar xistin. Li gor pêşbaziyê kesên ku dosyaya wan a helbestan heye lê heta niha li cihekê nehatiye weşandin dê bikaribe bi vê beşdarî pêşbaziyê bibe û dosyaya ku bi ser bikeve jî dê ji aliyê Weşanên Evrenselê ve bê çapkirin. Juriya Pêşbaziya Helbestê ya Arjen Arî ji Berken Bereh, Ehmed Huseynî, Rênas Jiyan, Şener Ozmen Îrfan Amîda, Fatma Savci û Behzat Brûsk Arî pêkdihat. Di pêşbaziyê de bi piraniya dengan dosyaya Selami Esen bi ser ket û bû yekemîn. Ev dosya dê heta Fûara Pirtûkan a Amedê ku di meha gulanê de li dar dikeve bê çapkirin û li fûarê bê belavkirin.

Her wiha ev sazî dê di çarçoveya fûarê de hin çalakiyan jî li ser Arjen Arî lidar bixin û bi vî awayî wî bibîr bînin.

Arjen Arî kî ye?

Nivîskar û helbestvan Arjen Arî di sala 1956'an de li herêma Omeriya, li gundê Çalê hatiye dinyayê. Di sala 1979'an de Enstîtuya Perwerdeyî ya Diyarbekirê Beşa Zimanê Tirkî qedand. Wekî gelek helbestvan û nivîskarên kurd wî jî bi tirkî dest bi helbêstê kir. Di sala 1976'an de li Nisêbînê ji ber belavkirina belavokekê hat girtin. Wê demê polîsan dest danîn ser helbestên wî yên bi tirkî û kurdî.

Heta niha di weşanên wekî Berbang, Kurdistan Press, Nûdem, Çira, Pelîn û Rewşen, Tîroj, W'yê helbestên wî hatine weşandin. Wî hem di Diyarnameyê û hem jî ji bo Azadiya Welat de qunciknivîskarî kir. 

Di sala 1992'yan de li navçeya Nisêbînê ew li ber deriyê mala xwe rastî êrîşeke çekdarî hat. Ew birîndar rakirin Nexweşxaneya Zanîngeha Dîcleyê. Ji wê bûyerê ve li Amedê dijiya.

Arî li dor deh pirtûk pêşkêşî pirtûkxaneyên kurdî kiribû û bi nivîsên xwe jî di kovar û rojnamegerên kurdî de cih digirt. Arî ku demekê di nav rêveberiya Komeleya Nivîskarên Kurd de cih girt, endamê komeleyê bû.

Hin berhemên wî:

Ramûsan min veşartin li geliyekî, Helbest, Avesta, 2000 

Ev çiya rûspî ne, Helbest, Avesta, 2002 

Destana Kawa, Helbest, Weşanên Elma, 2003 

Eroûtîka, Helbest, Weşanên Lîs, 2006

Bakûrê Helbestê/Antolojiya Helbesta Bakûr, Weşanên .Yekîtiya Nivîskarên Kurd a Dihokê, 2007

Çil Çarîn, Helbest, Weşanên Enstîtuya Kurdî ya Amedê, 2008 

Şêrgele, Helbest, Avesta, 2008

Bîhoka li pişt sînor, Çîrok-bîranîn, Wêşanên Avesta, 2010

Gorî û Bindest, Weşanên Ronahî, 2012

Kulîlkên Be’îvan / Hevbestî, Weşanên Ronahî, 2012