Hewlêr
Parlamenterê parlemena Iraqê yê kurd Mehmûd Osman derbarê hilbijartinên li Bakur û Tirkiyê, rewşa Rojava û kongreya netewî de nirxandin kirin. Osman derbarê hilbijartinên li Tirkiyê de bang li Kurdan kir û got: “Ev hilbijartin pir girîng e. Hêvîdarim ku hemû dengê xwe bidin xwe, bidin kurdî. Bila dengê xwe nedin Erdogan û partiyên din. Bila dengê xwe bidin partiyên wekî BDP, HDP û kesayetiyên kurd ên serbixwe. Çendî şaredariyan zêdetir bidestbixin baştir e, ji ber serkeftina di hilbijartinên şaredariyan de wê bibe pêngaveke girîng.”
Serkeftin çareserî ye
Osman da zanîn ku heta niha pêvajoya aştiyê pêşde neçûye û wiha got: “Ev du sale bi însiyatifa birêz Ocalan, pêvajoya aştiyê li Tirkiyê peyda bûye. Heta niha ev pêvajo pêşneketiye. Hikûmeta Erdogan îspat kir ku sozên dane, bi cih neanî. Ji ber vê divê kurdên bakûr deng bidin nûnerên xwe yên rast. Zêdetir şaredarî û herêman bi dest bixin. Serkeftinê ji wan re dixwazim.”
Nameya Ocalan
Osman derbarê nameya ku Rêberê Gelê Kurd Abdullah Ocalan ji bo serokê Herêma Kurdistanê Mesûd Barzanî şandî jî wiha got: “Nameya birêz Ocalan a ji bo Barzanî û bersiva wî, tiştên baş in. Dibe ku bibin wesîleya aramkirina rewşa niha û çareserkirina pirsgirêkên hene.”
Pirsgirêkên li Rojava
Osman bal kişand ser nêzîkatî û nenaskirina hersê herêmên kanton ên li herêma Rojava ya ji aliya PDK’ê ve û wiha got: “Ragihandina wan rêveberiyan tiştekî xwezayî û baş e. Ji ber welatî li wir hene û divê karên wan were birêvebirin. Pêwîstiya wan bi rêvebirinê heye. Ger hemû alî di nava wê rêveberiyê de hebin baştir e. Ji ber niha hinek li derve mane û ev jî bûye sedemê pirsgirêkan. Du caran herdu alî hatin Hewlêrê, li Hewlêr peyman îmze kirin û piştre nehatin bi cih kirin. Li aliyê din van bûyeran bandor li Kongreya Neteweyî jî kir.”
Pêwîste Kurd bibin yek
Siyasetmedarê Kurd Osman di berdewama axaftinên xwe de got: “Ez hêvîdarim ku Başûr rêveberiya Rojava nas bike û piştgiriya wan bike. Herwiha ew jî hewl bidin ku wê rêveberiya xwe hinekê berfireh bikin, hemû aliyên din jî beşdar bibin û heta lihev dikin. Hêvîdarim ku peywendiyên di navbera birêz Ocalan û Barzanî de, van pirsgirêkane çareser bikin.”
Çima kongre pêk nayê?
Osman behsa sedemên lidarnexistina Kongreya Netewî kir û wiha got: “Kongre ji ber bandora dewletên dagirker ên weke, Tirkiye, Sûriye, Iraq û Îran li ser heye. Ev naxwazin kongreya netewî çêbe. Bandora van dewletan li ser partiyan heye. Ji ber van her du sedeman lidarxistina kongreyê hat taloqkirin.” Osman xwest Kurd di nava xwe de lihev bikin û nekevin di bin bandora welatên derdorê de.
DÎHA