Cemil Oguz

Dema reqema 18+ derkeve pêşberî we çi tê bîra we? Lê ger navê pirtûkek be? Vaye pirtûka "Doxîn 18+" derket.

"Doxîn 18+" pirtûka Mehmet Devîren e ku ji Weşanên J&J derketiye. Pirtûk li ser çîrokên (çîrçîrokên) 18+ yên gelêrî yên kurdan e.

Di nav kurdan de gelek çîrok û çîrçîrokên li ser doxînê, seksê, pevşabûnê hene. Li nav civatê vegotina wan ne eyb e. Gelek caran jî ji bo dersê, ji bo şîretê têne bikaranîn. Li hin herêman çîrokên bi vî rengî zêdetir in, lê pir-hindik, li her herêmê hene. Heta niha ew di nav pirtûkan de yek bi yek be jî derketine pêşberî xwendevanan lê niha xebateke taybet li ber destê me ye; pirtûka "Doxîn 18+" ku ji van çîrokan hatiye amadekirin û weşandin.

Nivîskar Devîren di pêşgotina pirtûkê de gotiye "Beriya her tiştî ez lêborîna xwe ji hemû kurdan dixwazim. Di vê berhemê de pêkenokên kurdan ên berê yên ku di civatan de nayên gotin lê ji civatan belav dibin hene. Ji bo parastina van pêkenokan ev berhem hatiye amadekirin." Belê divê ev pêkenok bêne parastin, divê bibin pirtûk û mirov bixwînin jî lê çima lêborîn? Ji ber çîrokên li ser têkiliya pevşabûnê ne? Ji ber ku li ser doxînê ne? Bi ya min ne hewceyê lêborînê ye. Tiştê ku li nav civatê hebe, em çima wan berhev nekin û belav nekin? Her wiha nivîskar pêkenok dibêje lê belkî mirov nikaribe navê "pêkenokan" jî lê bike. Ji ber ku di pirtûkê de hin çîrok hene mirov pê nakene lê difikire. Jixwe di her destpêka çîrokê de rêzek hatiye bi cih kirin ku ji ser wê rêzê re bingeha çîrokê hatiye sazkirin.

Bi ya min ev çîrok jî wekî çîrokên din ên gelêrî gelek hêja ne û bi weşandina berhemeke wisa re xebateke hêja hatiye kirin. Devîren gotiye ku "her çiqas gelek pêkenokên bi vî rengî yên din jî li ber destê min hebin jî ev çendên sereke ne ku min ji nav wan neqandiye." Diyar e ku hê gelekên din ên wisa li ber destê Devîren hene û bi ya min xwendevan bi xwendina van re dê meraqa wan ên din jî bikin.

Tiştekî girîng ku li vir hatiye kirin jî ji bilî çend çîrokan (divê ew di vê pirtûkê de tune bana, ji ber ku lê nehatine, mînak çîroka "Selîmo" R.44, "Dest helal kirin" R.47, "Te ediland" R.55, û hinên din) hemû çîrok bi ser têkiliya pevşabûnê û mijarên wisa hatine hilbijartin û bi vî awayî pirtûkek taybet derketiye holê. Navlêkirina "Doxîn" jî hilbijartineke baş e ku di cih de fikra mirov ber bi wir de dibe. Belê "Doxîn 18+" bi çîrokên xwe yên balkêş li benda xwendevanan e.

Her wiha li gel vê pirtûkê romaneke Mehmet Devîren bi navê "Kortika Filehan" jî îsal ji Weşanên J&J derket.

Doxîn 18+ / Mehmet Devîren / Çîrçîrokên Gelêrî / Weşanên J&J / 64 rûpel