Diyarname

Serleşkerê Efsanewî yê Artêşa Wîetnamê General Vo Nguyen Giap di 102 saliya xwe de wefat kir.

Li gor daxuyaniya rayedarên Wîetnamê roja 4'ê vê mehê Giap li paytexta Wîetnamê li Hanoi di 102 saliya xwe de wefat kiriye.

General Giap li hemberî dargirkerên Fransiz û Amerîkayê wekî Serfermandarê Artêşa Wîetmanê serfermandarî kiriye, serketinên mezin di êrîşan de bi dest xistibû û piştî rizgariya Wîetnamê jî wekî lehengê neteweyî hatibû qebûlkirin.

Giap di sala 1954'an de jîrekiya xwe ya şer xebitandibû û bi dorpêçkirina Dien Bien Phu derbeya ku dê dawî li dagirkeriya Fransa ya li Başûrê Asyayê bîne lêdabû.

General Giap wekî Serfermandarekî Wîetnama Çepgir li hemberî Dewletên Yekbûyî yên Amerîkayê û li hemberî Başûrê Wîetnamê ku DYA'yê piştgirî dida şer kiribû û di sala 1975'an de Saigon bi dest xistibû. Ew tekane serleşker e ku di dîroka dinyayê de wî hem Fransa, hem DYA têk biriye.

General Giap di 25'ê gelawêja 1911'an de li gundê "An Xa" hatibû dinê. Hê di 14 saliya xwe de di nav koma şoreşger a ciwanan de cih girt. Di sala 1930'î de hat girtin û ew avêtin girtîgeha Lao Bao. Ji cezaya xwe ya 2 salan tenê 13 meh li vê girtîgehê dimîne û wî ber didin. Ew di sala 1931'ê de beşdarî Partiya Komunîst dibe û di êrîşên li Hindîçînî yên li dijî Fransizan de cih digire. Li hemberî dîroka leşkerî û felsefeyê meraqeke wî ya zêde heye, teoriya şer a Napolyon û Sun Tuzu dipejirîne. Ew di sala 1939'an de ligel Nguyen Thi Quang Thi ku ew jî şoreşger e dizewice. Wê salê rêveberiya Fransiz çalakiyên komunîstan qedexe dike, Giapê ku ew jî di nav van çalakiyên qedexekiri de bû direve Çînê. Ciap li wir beşdarî Wîet Minh ku rêberiya wê Ho Chi Minh dike dibe. Giap ji wê rojê heta serxwebûnê di nav şer de dimîne, serfermandarî dike û helbet bi ser dikeve.

Piştî bi serketina Wîetname û avabûna dewleta çepgir a Wîetnamê wî peywira Wezîriya Parastinê û Cîgiriya Serokwezîr jî girtibû ser milên xwe. 

Giap hin pirtûk jî nivîsandine. Ji pirtûkên wî "Şerê Gel ê Wîetnamê" li Tirkiyeyê ji bo tirkî hatibû wergerandin û ji Weşanên Bilim ve Sosyalîzm derketibû. 

Têbinî: Ev wêneyê wî di sala 2008'an de hatiye kişandin