SERÊKANIYÊ

Piştî pevçûnên dijwar ên di navbera hêzên YPG’ê û komên çekdar de, Deriyê Sînor ê Serêkaniyê yê di navbera bakur û rojavayê Kurdistanê de ket destê YPG’ê.

Li Serêkaniyê piştî ku duh komên Cephet El-Nusra, Emin Mislimîn û  Dewleta Îslamî ya Iraq û Bilad El-Şam êrîşî wesayîta YPG’ê kirin, pevçûnên dijwar qewimîn.

Di encama pevçûnan de hêzên YPG êrîşkar ji bajêr derxistin û şer li depoyên genim ên li nêzî sînor û Deriyê Sînor ê Serêkaniyê zêde bû.

Hate ragihandin ku di encama pevçûnên li vir de komên êrîşkar ji depoyên genim û deriyê sînor hatin derxistin.

Hate gotin ku beşek êrîşkaran reviyane Serêkaniya Bakur, beşek jî çûne aliyê Tel Xelefê.

Di vê navberê de li aliyê din ê sînor jî leşkerên Tirk bicîh bûne û car caran ji herdu aliyan dengê guleyan tê.

YPG'ê serê sibêya 17'ê mehê ragihandibû ku navenda El Nusra jî ketiye destê wan.

Her wiha ciwanê bi navê Mahsum Ertugrul ku duh bi guleyê El Nusra li Serê Kaniyê yê Serxetê birîndar bûbû îro wefat kir. 

Ji Ajansan hatiye girtin