Diyarname
Li Taksîmê hikumetê dixwest darên li Parka Seyranê ya Taksîmê jê bike û li wê derê AVM çêbike. Li ser vê ev çar roj in gel ji her alî ve ber bi Taksîmê ve diherikî. Û ev çar roj bûn polîsan bi hemû hêza xwe gaza çavsotîner bi ser wan de dibarand, erebeyên polîsan TOMA bi avê bi ser gel de diçû lê gel her ku belav bû, dîsa dihat ser hev. Û di encamê de roja 1'ê pûşperê, saet li dor 15.30  (li gor saeta Tirkiyeyê) polîsan bi paş ve gav avêt.

Vane notên çend rojan:

Bûyer çar roj berê dest pê kir. Şaredariya Bajarê Mezin a Stenbolê amadehî dikir ku darên li Parkê Hilkişîne. Parêzvanên Taksîmê (Platforma Parastina Taksîmê) jî her li hemberî vê hişyar bûn.

Sê roj berê şefeqê erebeyên Şaredariya Bajarê Mezin a Stenbolê hatin parkê ku daran hilkişînin. Di wê şefeqa sibê de bi qasî sedî 5'ê parkê zerar dît. Di wê demê de ji aliyekê ve gel li Taksîmê kom bû û ji aliyê din ve mebûs ber bi parkê ve çûn.

Berxwedana li hemberî vê talankirina parkê bi hewldana Mebûsê BDP'ê Sirri Sureyya Onder dest kir. Onder ku hat Taksîmê polîs dan alî û ji nişke ve xwe avêt nav cihê tê kolan. Onder xwe avêt ber kepçeyên ku ew der dikolandin û ew dan rawestandin.

Piştî ku Onder ji wan pirsî "Ka destûra we heye hûn vê derê dikolan? Ka biryara dadgehê?" hem derket holê ku biryareke kolandinê tune, hem jî kirî ku kepçe rawestin.

Berxwedan piştî vê yekê xurtir bû. Wê rojê heta êvarê di nav bera polîs û gel de xirecir dom kir. Bi şev parêzvanên Taksîmê li meydanê kon danîn û şev wir derbas kirin, lê nîvê şevê polîs û hin xebatkarên şaredariyê êrîşê gel kirin, konên wan dan ber agir ew ji qadê qewirandin.

Ji duh de hem ji aliyê Harbiye, hem ji aliyê Gumuşsuyu û hem jî ji aliyê Îstîklalê ve gel ber bi qadê ve meşiyan. Û ji duh de gazên çavsotîner û ava polîsan bi ser gel de kêm nebû.

Hema hema hemû hunermendên li Stenbolê piştgirî didan çalakiyê û pirniya wan jî dem bi dem beşdar bûn. Piştgirişa ji bo çalakvanên li Taksîmê li bajarên din jî deng veda. Ji Îzmîr heta Enqere, ji Amed heta bajarên din, li gelek bajaran çalakiyên piştgiriyê hatin lidarxistin.

Û îro:

Hevserokê KCDê Ahmet Turk, Hevserokê BDP'ê Selahattin Demirtaş, Serokê CHP'ê Kemal Kiliçdaroglu, Serokê MHP'ê Devlet Bahçeli êrîşa polîsan û helwesta hikumetê rexne kir.

Çalakiyên gel (endamên BDP, CHP, ên saziyên sivîl, kesên ji rêzê hemû têde) do kirin, daxwaza wan a ketina taxê dom kir.

Çawa ku endamên hemû partiyan ji bo Taksîmê ketibûn nava çalakiyan, alîgerên tîmên fûtbolê jî çalakî li dar xistin. Li dor hezar û 500 alîgirên tîmên Beşiktaş, Fenerbahçe û Galatasaray bi hev re ji bo Taksîmê meşiyan. Polîsan êrîşê wan jî kir. 

CHP ku îro dê li Kadikoyê mîtîng li dar bixista, mîtînga xwe betal kir û got dê saet 16.00'an ve li Beşîktaşê bicivin û ber bi Taksîmê ve bimeşin. Hin endamên MHP'ê jî îro li Taksîmê çalakî li dar xistin.

Di encamê de saet .i dor 15.30 polîs bi paş ve kişiyan û ji her alî ve gel ber bi qada Taksîmê ve herikî. Saet dema bû 16.00 êdî qad di destê gel de bû.

(Dema ev nûçe hat amadekirin çalakiya gel a li qadê dom dikir. Qad di destê gel de bû)