AMED
Bi pêşangiya DODEF û DUO-DER'ê ji bo piştgirîdayîna rojavayê Kurdistanê, li stada futbola Amedê dê konserek mezin li dar bikeve. Xwendekarên bi navê Îbrahîm Demîr û Şevîn Kara banga beşdariya konserê li amediyan kir.

Federasyona Komeleyên Xwendekarên Demokratîk (DODEF) û Komeleya Xwendekarên Zanîngeha Dîcleyê (DUO-DER) li ser biryara ku di encama Konferansa 4'ê Gulanê de derkertibû holê, bi armanca piştgiriya rojavayê Kurdistanê dê di 3 pûşperê, saet 17:00'an de li stada futbolê ya Amedê konserek mezin li dar bixe.

Di vê çarçoveyê de xwendekaran ji bo konserê 10 hezar bilêt çap kirine û pereyên ku ji vê bêne bidestxistin dê ji gelê rojavayê Kurdistanê re bişînin. Xwendekarên bi navê Îbrahîm Demîr û Şevîn Kara, diyar kirin ku ew li bendê ne ji bo gelê rojavayê Kurdistanê tevkariyek baş derkeve holê. Xwendekaran da zanîn ku ew hêvî dikin gelê Amedê bi hestiyarî tev bigere û wezîfeya xwe berpirsyariya li pêşberî Rojava bi cih bînin.

Konser dê bi beşdariya hunermend Seyda Perîçek, Hîvro, Bulent Turan, Koma Gulên Xerzan, Hemê Hecî, Koma Grava Rojê û Kadîr Çat li dar bikeve.

Parlamenterên BDP'ê jî dê beşdarî konserê bibin.

Kesên bixwazin dikarin ji DUO-DER, MEGAM-DER, Uç renk cafe, Pirtûkxaneya Aramê, Parka Ormanê, Parka Sumerê, Parka Koşuyolu, Parka Rihan, Roj Cafe, û Kolana Hunerê bilêtan bi dest bixin.