Zekî Ozmen

Civana îmzeyê ya rapvanê almanî yê kurd Xatar polîs xistin di nava liv û tevgerê. Li firoşxaneya mezin a bi navê Arcade ya bajarê Koln a Almanyayê civana îmzeyê ya Xatar hebû lê belê ji ber metirsiya îzdihamê civan hate betalkirin û Xatar jî bêyî ku heyranên xwe bibîne bi dizî ji firoşxaneya revî.

Çav li rê bû ku Xatar êvara pêncşemê (9'ê mehê) saet navbera 18:00 û 20:00'an li Arcade hem heyranên xwe bibîne û hem jî danasîna albûma xwe ya nû ya bi navê "Das wird wild!" bike. Lê hê civanê destpênekiribû, zêdeyî 600 heyranên wî li nava firoşxanê kom bûn. Ji ber amadekariyên şîrketa taybet ya ji bo civanê hatibû peywirdarkirin têra eleqeya heyî nekir, 25 erebeyên polîsan hatin devê firoşxaneyê. Her wiha gelek ambûlans û agirkuj jî li wir amade bûn. Piştî heyranên Xatar bihîstin ku ew ê ji  ber metirsiya îzdihamê tevlî civanê nebe, aloziyan rû da. Heyranên wî kom bi kom li parkên erebeyan û li derdora firoşxaneyê li wî geriyan û alozî di  navbera wan û polîs de derket. Ev yek bû sedem ku civana Xatar a bi heyranên wî re pêk nehatî di nava çapemeniya alman de cihekî berfireh bigire. Xatar rapvanekî li Almanyayê di nav ciwanan de gelekî navdar e.

Ew bi xwe xelkê Rojhilat e û kurê komponîst Îqbal Hajabî yê ku di salên 90'an de dîrîgentiya orkestraya bi Koma Berxwedan re derdiket ser dikê dikir û wê demê aranjoriya çend berhemên Hunerkomê jî kiribû.

Xatar li Almanyayê yek ji serkêşê rap a almanî ye. Ew di sala 2009'an de ji ber tohmeta şelandina bi buhayê 1,7 mîlyon Euro zêr ketibû rojevê. Di sala 2010'an de li ser daxwaza Almanyayê li Hewlêrê hatibû girtin û radestî vî welatî hatibû kirin. Di dawiya 2014'an de jî hatibû berdan.

Xatar albuma xwe "Nr. 415" di sala 2012'yan de li girtîgehê çêkir û li Almanyayê di nav albumên herî zêde têne firotin de di rêza 19'an de cih girt. Vê yekê kir ku ew hê zêdetir bala raya giştî bikişîne. Lê serkeftina wî ya herî mezin di sala 2015'an çêbû. Albuma wî ya bi navê "Baba aller Babas" ya wê salê derket, di nava lîsteyên muzîka Almanyayê têne firotin de bû yekemîn. Xatar di warê naveroka gotinên stranên xwe de bi tundî tê rexnekirin. Lê belê digel vê yekê jî li Almanyayê yek ji rapvanê herî zêde tê guhdarkirin e.