Diyarname
Ajansa Anadolu (AA) ajansa fermî ya Tirkiyeyê ye. Ajans di 6'ê avrêla 1920'an de dest bi weşanê kiriye û niha kete 93 saliya xwe.
Ajans niha bi 5 zimanan (Tirkî, Îngilîzî, Erebî, Boşnakî û Rusî) weşanê dike. Midûrê Giştî yê AA'ê Kemal Ozturk ragihand ku dê di 1'ê rezbera 2013'yan de dest bi weşana bi kurdî (soranî) bikin. Ew dibêje ku di sala 2020'an de ew dê bi 11 zimanan weşanê bikin.

Ajans dê bi soranî weşanê bike û xîtabî kurdên başûrê Kurdistanê bike.

Ozturk ji bo NTV wisa got: "Em dixwazin gotinên Serokomar, Serokwezîrê xwe bi soranî ragihînin gelê wê derê:"

Ajansa Anadoliyê ku ajansa fermî ya Tirkiyeyê ye, li gor rêziknameya xwe divê bi qasî cih dide hikumetê cih bide partiyên in ên li meclisê jî lê AA'ya niha zêdetir li ser xeta hikumetê weşana xwe dike. Mirov nikare li ser BDP'ê nûçeyeke di ajansê de bibîne, bi taybetî jî nûçeyeke erênî.

Ozturk li ser kurdî bi van gotinan niyeta xwe jî eşkere dike: "Yê me hedefa me ya li ser weşana bi kurdî çapemeniya Bakurê Iraqê ye. Li Bakurê Iraqê rojnameyeke ku bi soranî derdikeve heye. Nûçeyên der barê Tirkiyeyê de ji ku digire? Mixabin ji Firat Newsê digire. Li wê derê li dor 30 saziyên çapemeniyê hene. Me lêkolîneke cidî kir. Emê di 1'ê rezberê de dest bi weşana bi soranî bikin."

Çend agahiyên li ser AA'yê

- AA ji bo "dengê Anadoliyê bigihîne dinyayê" ji aliyê Ataturk ve hat avakirin. Ji wê rojê de li ser xeta dewletparêziyê weşana xwe dike.
- Aa rojê 1.500 nûçeyan, li dor hezar wêneyan û li dor 200 vîdyoyan pêşkêşî aboneyên xwe dike.
- Li Misir, Fas, Gazze, Lubnan, Lîbya, Tunus, Quds û Hewlêrê ofîsên AA'yê hene
- Weşana bi erebî a AA'yê bû salekê dest bi weşana xwe kiriye û ew jî niha li dor 200 nûçeyî diweşîne.

Wekî nota dawî: Midûrê AA'yê eşkere dike ku ji ber ANF'ê dest bi weşanê dikin. Wisa dixuye ku ew nebe dê nekin.