Diyarname
Enstîtuya Kurdî ya Stenbolê îsal Xelata Ziman a Feqî Huseyîn Sagniç da Saziya Zimanê Kurdî (SZK) ku li rojavayê Kurdistanê li ser ziman xebatê dike, li dibistanan dersên kurdî dide. Di merasima xelatdayînê de nûnera SZK'ê Nesrîn Qamişlo got: "Ji Dêrikê heta Efrînê li dibistanan em dersê didin."
Ji sala 2005'an de Enstîtuya Kurdî ya Stenbolê Xelata Ziman a Feqî Huseyîn Sagniç dide kes û saziyên ku ji bo parastin û pêşbvebirina kurdî xebatê dikin. Saziyê îsal SZK ku li rojavayê Kurdistanê li ser kurdî xebatê dike, mamosteyan digihîne, li dibistanan dersên kurdî dide ji bo xelatê guncan dît. Xelat li ser navê yek ji avakarên Enstîtuya Kurdî zimanzan Feqî Huseyîn Sagniç tê dayîn. Ji bo merasima xelatdayînê êvara 12'yê adarê ku di heman demê de roja salvegera wefata Sagniç e jî li Cezayîr Restorantê şeveke hate li dar xistin. Di merasimê de Seroka BDP'a Stenbolê Asiye Kolçak, Serokê Enstîtuyê Zana Farqînî, rêveber û endamên Enstîtuyê, Serokê Kurt-Kavê Kasim Ergun, Serokê Weqfa Îsmaîl Beşîkçî Îbrahîm Gurbuz, nûnerên saziyên kurd, nivîskar û rewşenbîrên kurd li dor 150 kesî amade bûn.
Binxet ji ser Xetê serketîtir e
Serokê Enstîtuya Kurdî ya Stenbolê Zana Farqînî di axaftina kir de bal kişand ser salvegera şehîdkirina kurdên di 12'yê Adarê yên li rojava de, li ser rojava sekinî û got: "Rojava bi taybetî di warê çandê de xebatê dikin, nivîsan dinivîsin, em dema nivîsên wan dixwînin em dibînin ên bin Xetê ji ser Xetê pêşketîtir in. Ji ber ku ji asîmîlasyonê dûr in."
Farqînî ji bo dayîna xelatê ya SZK'ê jî wisa got: "SZK gavên girîng diavêje, dibistanan vedike. Me xwest bi vê xelatê em wan pîroz bikin."
Nûnerên SZK'ê Mîrza Şengalî û Nesrîn Qamişlo di merasimê de ji bo xelatgirtinê di merasimê de amade bûn û ji bo sipasî derketin ser dikê û axivîn.
Şoreşa ziman wê bi ser bikeve
Mîrza Şengalî got ku Feqî Huseyîn Sagniç di qada têkoşîna wêjeya kurdî de têkoşer bû û bi vê xelatê Enstîtuya Kurdî li kedkar û mamosteyên xwe xwedî derdikeve, loma ev xelat giranbuha ye. Şengalî li ser rewşa ziman a li rojava jî wisa got: "Me karî bingeha pêşvebirina ziman biavêjin. Ji aliyê siyasî, leşkerî û di warê ziman de şoreş çêdibe. Niha li seranserê rojava perwerdehiya ziman hatiye pejirandin. Şoreşa ziman wê li rojava bi ser bikeve, wê bibe mînakek hêja ji bo hemû parçeyên Kurdistanê."
Hefteyê 3 rojan dersên bi kurdî
Nûnera SZK'ê Nesrîn Qamişlo jî got ku xebata ziman ji berê de li rojava tê meşandin û li ser rewşa niha wisa got: "Ji Dêrikê heta Efrînê li dibistanan em ders didin. Lê hin nijadperest hene dixwazin ev xebat bisekine. Li Qamişlo gotin ev xebat dê bê sekinandin. Lê bi berxwedana mamoste û xwendekarên me xebat dom kir. Niha hefteyê 3 rojan li dibistanan em bi kurdî dersê didin."
Di şeva ku Mela Kerem Soylu, Seroka BDP'ê Asiye Kolçak, kurê Feqî Huseyîn Sagniç axaftin kirin de sînevîzyona li ser Sagniç hatibû amadekirin hat weşandin û dûre dengbêj Sebrî Agirî, Xeniyê Qereyazî, Mihemedê Beyro û hunermend Alî Baran klam û stranên xwe pêşkêş kirin.
Foto: Cemil Oguz
***
Nûçeya eleqedar:
- Enstîtu, Xelata Feqî Huseyîn Sagniç dide SZK'ê
***
Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.