Diyarname
Ciwanmerd Kulek piştî romanên bi navê “Nameyek Ji Xwedê Re” (Lîs, 2007) û “Otobês”ê (Lîs, 2010) vê carê bi romana xwe ya nû “Zarokên Ber Çêm” derket pêşberî xwendevanê xwe.
Yunus Eroglu ku heta niha du roman derxistibû ji niha û pêde navê Ciwanmerd Kulek bikar tîne û bi navê xwe yê nû romana xwe ya nû pêşkêş kir jî.
“Çîroka Zarokên Ber Çêm” a Ciwanmerd Kulek ji dema dawî ya Osmaniyan dest pê dike. Postevanê ku fermana Sultanê Osmaniyan tîne ji Mîrê Hekariyan re, di rê de nexweş dikeve û piştî ku ji hêla hekîmê mîrê Hekariyan Mîrza Hekîm ve tê dermankirin, fermanê bincilik dike. Mîrza Hekîm û malbata xwe koç dikin herêma Mêrdînê û li wir bi cî dibin. Çîrok bi evîna keça Mîrza Hekîm, Koçerê û xortekî gundê ku Mîrza Hekîm konê xwe lê vegirtibû didome. Çîrok bi vegotineke ji çavên kesê yekemîn lê bi zimanê kesê sêyemîn berdewam dike, tê heta roja îro.
Romana ku bi devê zarokan hatiye nivîsîn a çîroka nod salên malbateke kurd vedibêje, her çi qasî çîrokeke takekesî be jî bûyerên girîng yên mîna serhildana Şêx Seîd, Serhildana Dêrsîmê, Komara Mehabadê, Girtîgeha Amedê, şerê kurdan yê dawî jî dixemilîne.
Çîroka Zarokên Ber Çêm ku nû derket, gihîşt Fûara Pirtûkan a Stenbolê ku heta 25’ê mehê dê li dar be. Yên bixwazin dikarin ji standa Weşanên Lîs romanê peyda bikin.

Zarokên Ber Çêm / Ciwanmerd Kulek / Roman / 408 rûpel