Riha
Platforma Saziyên Demokratîk  bi diruşma "Statuya kurdî, perwerdehiya bi kurdî" li Sêwrega Rihayê komxebata zimanê kurdî li dar xist. Komxebat li avahiya Komeleya Ziwan Kurdê li dar ket û gelek kes têde amade bûn. Komxebat bi kirmanckî (zazakî) hat birêvebirin.

Çalakvanê zimanê kurdî û nivîskar Rifat Ronî moderatoriya rûniştina ewil a komxebatê kir. Perwerdekar Ferîde Akturan û parêzer Cemîle Turhalli jî wekî axifger beşdar bûn.

Ferîde Akturan di axaftina xwe de bal kişand ser mijara “Perwerdehî û pirzimaniyê” û destnîşan kir ku perwerdehî ji bo zindîhiştina zimanekî gelek girîng e. Akturan diyar kir ku divê zimanê kurdî bibe zimanê perwerdehiyê.

Parêzer Cemîle Turhalli jî bal kişand ser mijara “Ziman, hiqûq û siyasetê” û xwest di yasayan de guhertin pêk werin û zimanê Kurdî bibe zimanê perwerdehiyê.

Di rûniştina duyemîn a komxebatê de rêvebera Komeleya Wêjekarên Kurd Stran Yaşar moderatoriyê kir û perwerdekar Firuzan Demîr, Hevserokê Komeleya Wêjekarên Kurd Haci Ozkal û nivîskar Ehmedê Bira wekî axifger amade bûn.

Haci Ozkal li ser mijara “Duh, îro û siberoja ziman” axivî û diyar kir ku zext û zordariya serdestan û netewedewletê nehişt zimanê kurdî li pêş bikeve û bibe zimanê perwerdehiyê.

Firuzan Demîr jî li ser mijara “Ji bo ku zarok zimanê dayikê hîn bibin teşwîqa medya dîjîtal” rawestiya û anî ziman ku her roja ku diçe zaravayê kirmanckî tune dibe û xwest xwedî li zaravayê kirmanckî derkevin û got ku ji bo xwedîderketinê jî pêwîst e ziman bê hînkirin û belavkirin.

Nivîskar Ehmedê Bira jî herî dawî axivî û li ser mijara “Weşan û medya” gotarek pêşkêş kir û bal kişand ser tunebûna zaravayê kirmanckî û banga xwedîderketina li zaravayê kirmanckî kir.
Ajansa Welat