Diyarname
Îro li gelek bajaran pîrozbahiya Newrozê hebû. Newroza ku îsal bi diruşma "Newroza Azadî û Yekîtiya Demokratîk” li dar dikeve, bi coş didome. Li bajarên wekî Wan, Stenbol, Batman, Îzmîr, Manîsa, Antalya, Bursa, Sêrt, Çewlig, Agirî, Balikesîr û Enqereyê bi sed hezaran kesî Newroz pîroz kir

Va ne notên îro:

WAN
BAKIRHAN: EV NEWROZA SERDEMEKE NÛ YE
Li Wanê bi deh hezaran kes li ber Keleha Wanê hatin ba hev.  Veysî Aktaş ku piştî 30 salan hat berdan, dîsa aktîvîsta TJA'yê Derya Aslan li Newrozê axivîn. Dûre Hevserokê DEM Partî Tuncer Bakirhan li vir axivî û got, "Ev Newroz, Newrozeke avaker e. Newroza serdemeke nû ye. Em dibêjin serdemeke nû, lê wekî ku hêzên ewlehiyê yên li Wanê ji vê serdema nû ne agahdar in. Ew di serdema kevin de mane. Ew neguherîne. Ew hîn jî difikirin ku bi zextên li ser gelê Wanê dikarin rê li pîrozkirina Newrozê bigirin. Ez li vir kesên ku îro li nuqteyên lêgerînê eziyetê li gelê me dikin şermezar dikim. Em dibêjin ku me serdemeke nû da destpêkirin. Em hewl didin jiyaneke ku tê de şer û tundî nîn be û pirsgirêka Kurd bi rêyên demokratîk çareser bibe ava bikin. Hêvî dikim ku bayê aştiyê yê li Enqereyê diêşe, li Wanê jî bixe.”
"Ev pêvajo ji bo 86 mîlyonî ye. Ev pêvajo Tirkiyeyê perçe nake, berevajî wê dike yek û bira. Ez bang li Kurdan dikim: Em yek in. Kobanê ji bo me çi be, Wan ew e. Urmiye ji bo Kurdan çi be, Silêmanî û Hewlêr ew e. Divê Kurd di vê serdema ku qedera gelan tê diyarkirin de, yekitiya xwe ya neteweyî û demokratîk ava bikin. Dibe ku cudahiyên me hebin, lê di vê pêvajoyê de divê tu partî û saziyeke Kurd ji yekitiyê nereve.”
Piştî ku stranbêj Şiyar Berwarî û Hozan Şervan 

ÎZMÎR
BAYINDIR: EM TÊKOŞÎNa STATUYA XWE DIKIN
Li Qada Gundogdu ya Îzmîrê bi hezaran kurd hatin ba hev û Newroza xwe pîroz kirin. Hevserokê DBP'ê Keskin Bayindir ku axivî got, "“Ev Newroz Newroza azadiyê ye, Newroza Demokrasiyê ye. Ev Newroz Newroza yekitiya Gelê Kurd e. Dê Kurd bi Rêbertiya xwe ve azad bibin. Sed sal berî niha li vî bajarî Statuya Kurdan dihat axaftin. Dihat gotin ku mafê Kurdan heye. Lê belê sed salan hebûna Kurdan înkar kirin. Dema ku wê demê behsa Kurdan dikirin Kurd ne li vê derê bûn lê belê em li vî bajarî ne. Em bi mîlyonan in û behsa azadiya xwe dikin. Em têkoşîna statuyê didin, têkoşîna zimanê xwe didin. Tu kes nikare Kurdan înkar bike, zimanê Kurdan qedexe bike. Me têkoşîn da meşandin û bedelên giran dan. Hinek dibêjin ‘ma qey hûn lewaz ku aştiyê dixwazin.’ Na, em ne ji ber lewaziyê, me aştî û azadiyê heq kir.
Piştî axaftinan Seyithan Sevînç derket ser dikê û stranên xwe pêşkêş kirin.

BATMAN:
Li Batmanê gele bi deh hezaran kes hatin ba hev. Li vir endama Heyeta DEM Partiyê ya Îmraliyê Pervîn Bûldan axivî û got, "Divê Ocalan di şert û mercên azad de bixebite. Êdî dema mijûlbûnê nîn e divê gavên pratîk bên avêtin. Ji sibê û şunde divê bingeheke qanûnî bê danîn. Ev erdnîgarî ji bo aştiyê amade ye.”

STENBOL
Li Stenbolê carek din bi sed hezaran gel li Qada Yenîkapiyê bûn. Hevseroka DEM Partî Tulay Hatimogullari li vir axivî û got: “Divê şert û mercên xebata azad a birêz Ocalan pek werin. Em Newroza birêz Ocalan jî pîroz dikin û daxwaza azadiya birêz Ocalan careke din tînin ziman. Em ji xwe bawerin, siyaseta xwe bawerin û ji we bawerin. Ji bo demokrasî û aştiyê têkoşîna me dê bidome.
Herî dawî Koma Amed derket ser dikê û stran^ne xwe gotin.

ANTALYA
Li Antalyayê bi hezaran kes li Qada Bajêr a Kepezê hatin ba hev. Parlamenterê DEM Partiyê yê Antalyayê Saruhan Oluç axivî û got, "Gelê kurd têkoşîna maf, hiqûq, demokrasî û azadiyê dide."
Piştî axaftinan Koma Hîvron bi stranên xwe coş da beşdaran.

MANÎSA
Li Manîsayê li Qala Lale gel hat ba hev û Newroza xwe pîroz kir. Piştî axaftinan  Koma Rojhilat, Koma Agire Zerdeşt, stranbêj Cevdet Gulbau, Azad Ararat û Murat Elmastaş bi stranên xwe gel coşandin.

BURSA
Li Bursayê qelebalixek mezin hebû. Mebûsê DEM Partî Sirri Sakik ku axivî got, "We îro Bursa şibandiye Amedê, we şibandiye Wanê."

BAJARÊN DIN
Li aliyê din îro li Sêrtê, li Çewligê, li Agirî, li Balikesîrê, li Enqereyê jî bi hezaran kesî Newroz pîroz kir