AMED
Platforma Saziyên Demokratîk a Amedê û Saziya Çandê ya Pîr Sultan Abdal, Seyîd Riza û hevrêyên wî bi bîr anî û gotin: “Mîrateyê Seyîd Riza bûye nexşerêya me. Li dijî zilmê tu carî serî netewand.”

Rayedarên dewletê 88 sal berê roja 15'ê sermaweza 1937'an Seyîd Riza û hevrêyên wî li Qada Erase ya Genim a Xarpêtê îdam kirin. Platforma Saziyên Demokratîk a Amedê û Saziya Çandê ya Pîr Sultan Abdal bi boneya salvegera 88'emîn a îdamkirina Seyîd Riza û hevrêyên wî li Qada Şêx Seîd daxuyanî dan. Nûnerên platformê û gelek kes amade bûn. Li ser masayê wêneyên Seyîd Riza vekirin û find pêxistin. Endamên platformê pankarta “Me çok nedanî, sere me bilind ber bi azadiyê ve dimeşin” vekirin.

Hevseroka DBP'ê ya Amedê Rûçem Vefa Elyakut bi kurdî û Hevserokê DEM Partiyê Abbas Şahîn jî bi tirkî daxuyanî xwend. Rûçem Vefa Elyakut diyar kir Seyît Riza û rêhevalên wî 88 sal berê hatin darvekirin û got: “7 Seyîdên ku warê derwêşan bê xwedî nehiştin, bi têkoşîneke bêhempa mohra xwe li dîrokê dan. Wan li dijî zilma zaliman tu caran serî netewandin.”

‘Diyarkirina gorên Seyît Riza û rêhevalên wî dê xizmeta aştiya civakî bike’

Rûçem Vefa Elyakut destnîşan kir ku banga "Aştî û Civaka Demokratîk" a Ocalan banga ronîkirina heqîqetê ye û wiha dom kir:  “Hevrûbûna bi Komkujiya Dêrsimê re, wê bibe haveyna pêşeroja hevpar û wekhev a gelan. Diyarkirina cihê gorên Seyît Riza û rêhevalên wî pêdiviyên sazkirina aştiya civakî ye.”

Parlamenterê DEM Partiyê ya Amedê Serhat Eren jî diyar kir ku bi kuştina Seyîd Riza û hevreyên wî xwestin gelê kurd tune bikin lê gelê kurd tu carî serî netewand.

BILA CIHÊ GORA WAN BÊ EŞKERE KIRIN
Li aliyê din Platforma Saziyên Demokratîk a Wanê jî daxuyanî da çapemeniyê û got: “Eşkerekirina cihên gorên Seyîd Riza û hevrêyên wî ji bo aştiyeke mayînde gelek girîng e.”
AW